Ministria e Mbrojtjes së Serbisë ka lëshuar një deklaratë duke marrë shkas një postim në twitter të një profili me emër Visar Kelmendi i cili ka shkruar se nëse ushtria e Serbisë dhe Vuçiq planifikojnë të intervenojnë në Kosovë atëherë ata do të kalojnë më keq se Saddam Husseini. Kjo kinse ka alarmuar Ministrinë serbe të Mbrojtjes të cilët duket se e kanë pasur qëllim të vetëm për të theksuar se nuk e përjashtojnë hyrjen në Kosovë me ushtri duke thënë se tash për tash nuk e kemi kaluar linjën administrative të Kosovës.
Një profil i paverifikuar në Twitter kishte shkruar diçka lidhur me futjen e ushtrisë së Serbisë në territorin e Republikës së Kosovës, e si duket këtë Vuçiq e ka marrë si shkas që të përmend ndërhyrjen me ushtri në veri.
Kështu ka reaguar ministria e mbrojtjes së Serbisë lidhur me këtë tweet.
“Për shkak të sasisë së madhe të dezinformatave që administrata e Prishtinës nxjerr qëllimisht dhe që shpërndahet përmes llogarive të rreme në rrjetet sociale dhe uebsajte të caktuara, dhe në të cilat thuhet se gjoja ka pasur konflikte mes ushtrisë serbe dhe policinë e Kosovës, Ministria e Mbrojtjes njofton se ushtria serbe për momentin nuk ka kaluar vijën administrative dhe në asnjë mënyrë nuk ka hyrë në territorin e Kosovës”, shkruan në një reagim ministria serbe e Mbrojtjes.
