Katër pasuri të llojit “tokë arë” në bregdetin e Lezhës, që vlerësohen 13 milion euro, janë vendosur nën sekuestro në bazë të një vendimi të një Gjykatës së Posaçme me kërkesë të SPAK. Sipas prokurorisë, pronat janë përfituar në mënyrë të jashtëligjshme, por në një njoftim të prokurorisë nuk përcaktohet se kush janë përfituesit.
Hetimet
Prokuroria e Posaçme kundër Korrupsionit dhe Krimit të Organizuar, bën me dije se me datë 20.12.2019 ka regjistruar procedimin penal nr.29, për veprat penale “Prodhimi dhe shitja e narkotikëve”, “Trafikimi i narkotikëve”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Gjatë hetimit të këtij procedimi penal, sipas akuzës, ka rezultuar se disa shtetas në bashkëpunim me njëri tjetrin dhe në bashkëpunim me zyrtarë shtetërorë, nëpërmjet dokumenteve të falsifikuara dhe veprimeve të tjera të kundërligjshme, kanë përfituar në mënyrë të paligjshme një sipërfaqe prej 66 000 m2 tokë në disa zona bregdetare në Lezhë, me një vlerë prej rreth 13 milion euro.
Këto prona, sipas SPAK, kanë rezultuar se janë produkt i veprave penale të përshkruara më sipër.
Pronat e sekuestruara
Prokuroria e Posaçme kundër Korrupsionit dhe Krimit të Organizuar ka paraqitur kërkesë për vendosjen e masës së sigurimit pasuror “sekuestro preventive” për këto pasuri dhe nga ana e Gjykatës së Posaçme për Korrupsionin dhe Krimin e Organizuar me vendimin nr.345 datë 28.07.2022, është vendosur pranimi i kërkesës së Prokurorisë së Posaçme kundër Korrupsionit dhe Krimit të Organizuar.
Pasuritë ndaj të cilave është vendosur “sekuestro preventive”:
- Pasuria e paluajtshme e llojit “tokë arë”, me sipërfaqe 8000 m2, Ishull Lezhë.
- Pasuria e paluajtshme e llojit “tokë arë”, me sipërfaqe 1148 m2, Ishull Lezhë.
- Pasuria e paluajtshme e llojit “tokë arë”, me sipërfaqe totale prej 27,009.80 m2, me adresë në Mali Rencit, Lezhë.
- Pasuria e paluajtshme lloji i pasurisë “tokë arë”, me sipërfaqe totale prej 30,663.70 m2, me adresë në Mali Rencit, Lezhë.
