Ka mbërritur në sheshin Skënderbej, ku prej një ore po këndohet playback nga artistë shqiptarë, ambasadorja amerikane Yuri Kim.
Kësaj të fundit ambasadorët i kanë gjetur vendin në krahë të Damian Gjiknurit.
Ishte kryebashkiaku i Tiranës Erion Veliaj ai që priti i pari ambasadoren, dhe më pas Kim u pozicionua në krah të Gjiknurit dhe Linda Ramës.
Vetë kryeministri zgjodhi që të ishte në rreshtin e dytë, si për të pasur më shumë në kontroll atë që ishte duke ndodhur.
Edhe pse parashikohej që fjala e Ramës të ishte rreth orës 20:30, deri tani në skenë janë ngjitur vetëm këngëtarë si Xhensila Myrteza, Flori Mumajesi, apo Ylli Limani.
Koncerti i sotëm vjen në një kohë kur infektimet nga Covid janë mbi 1 mijë në një ditë, dhe numri i viktimave vetëm sot ishte 3.
Megjithatë qeveria shqiptare e pa të udhës që të organizonte një koncert të tillë, për të kremtuar sipas saj 100 vjetorin e marrëdhënieve me SHBA si dhe çeljen e negociatave të anëtarësimit për në BE.
