Shtyhet gjyqi ndaj Fetah Marrës, burrit që vrau fqinjën, Fatime Suli në Kozare të Kuçovës. Fetah Marra nuk u paraqit në seancën paraprake, në momentet e fundit, duke pretenduar se ishte sëmurë në burg, ndërsa sot ishte caktuar se do të zhvillohej seanca paraprake ndaj tij. Mirëpo në momentet e fundit Marra ka bërë si i sëmurë në burg, duke pretenduar se kishte dhimbje por ende nuk ka një vlerësim mjekësor që ta konfirmojë këtë.
Familjarët e viktimës 63-vjeçe janë irrituar mjaft pasi ata do të kërkonin sot në këtë seancë paraprake rikthimin e dosjes në Prokurorinë e Beratit për hetime të mëtejshme pasi pretendojnë se bashkëpunëtor në vrasje me Fetah Marrën ka qene edhe komshiu i tyre Izet Marra, për të cilin viktima u kishte thënë se e ngacmonte seksualisht prej muajsh. Megjithatë në këto kushte, seanca paraprake u shty për në datën 8 Shtator.
Sipas familjarëve, shtirja e Fetah Marrës si i sëmurë dhe mosparaqitja e tij në këtë seancë është bërë pikërisht për të siguruar e dhënë kohë Izet Marrës, të dyshuarit të familjes Suli si bashkëpunëtor në vrasje.
Ngjarja e rëndë ndodhi mbrëmjen e 20 Janarit në lagjen “Havaleas” në fshatin Kozare të Kuçovës. 64-vjeçarja Fatime Suli u gjet në kanal gjysmë e zhveshur dhe e mbuluar me gjethe. Familjarët e kishin kërkuar prej disa orësh dhe pasi nuk e kishin gjetur njoftuan policinë. Një orë më vonë trupi i saj u gjet rreth 1 km larg banesës.
Si rezultat i autopsisë mjeko ligjore rezultoi se gruaja kishte ndërruar jetë si pasojë e mbytjes. Kjo vuri në lëvizje policinë duke marrë në pyetje banorët dhe duke këqyrur pamjet filmike në kamerat e sigurisë në disa biznese në zonë duke identifikuar edhe autorin Fetah Marra. Sipas dëshmisë së dhënë prej tij në prokurori, shkaku ka nisur për një borxh 6 mijë lekë që sipas Marrës, viktima ia kishte atij dhe nuk ia jepte prej disa kohësh.
