Nga falsifikimi i të dhënave te njoftimi i shoferëve pa licencë për të shmangur kontrollet. Këto janë disa nga shkeljet e konstatuara nga hetimet për katër efektivët e rrugores së Vlorës dhe një ish-polic, të proceduar penalisht e të pezulluar nga detyra.
Referuar dosjes së prokurorisë së rrethit të depozituar në gjykatë, procedimi penal nga akuza është regjistruar më 21 Shkurt të këtij viti për veprat penale: “Shpërdorim detyre” dhe “Korrupsioni pasiv i personave që ushtrojnë funksione publike”.
Efektivëve u janë përgjuar bisedat telefonike, ndërsa janë kryer edhe vëzhgime në terren në një hetim ku janë përfshire përveç prokurorisë edhe Agjencia e Mbikëqyrjes Policore, konkretisht drejtoria e Vlorës dhe ajo e Gjirokastrës.
Hetimet
Sipas hetimeve të prokurorit Arjan Xhaferraj, krijohet dyshimi i arsyeshëm i bazuar në prova, se punonjësit e policisë rrugore: Medin Çanaj, Armir Xhafaj, Renols Mataj, Taulant Kasa, Endri Kasaj, në bashkëpunim me njëri-tjetrin, me anë të veprimeve të kundraligishme të kryera gjatë ushtrimit të detyrës së tyre funksionale si punonjës të sektorit të qarkullimit rrugor në Drejtorinë Vendore të Policisë Vlorë, në kohë dhe vende të ndryshme, kanë shpërdoruar detyrën duke ndëshkuar me masa administrative jo në proporcion me shkeljen e kryer drejtues të ndryshëm automjetesh.
Po ashtu, akuzohen se kanë falsifikuar të dhënat e fiksuara nga radari sa i përket identitetit të kundërvajtësve, me qëllim mos penalizmin e tyre dhe heqjen e automjeteve nga sistemi “Alert”, duke i shkaktuar dëm ekonomik si dhe duke cënuar interesat e ligjshme të shtetit, duke konsumuar elementë të veprës penale të “Shpërdorim detyre”, kryer në bashkëpunim.
Po kështu, sqarohet me tej në dosjen hetimore, ka rezultuar e provuar se disa prej punonjësve të mësipërm të policisë, kanë kryer veprime të kundërligjshme që kanë konsistuar në njoftimin më parë të personave të ndryshëm që ofrojnë në mënyrë të parregullt dhe pa licensë shërbimin taksi dhe furgon pasagjerësh në qytetin e Vlorës, duke dekonspiruar kështu kryerjen e aksioneve dhe kontrolleve ndaj këtyre subjekteve nga kolegët e tyre.
Masat
Prokuroria kërkoi në gjykatë pezullimin nga detyra për katër efektivë të rrugores dhe detyrim paraqitje për personin tjetër të proceduar, i cili tanimë nuk është më pjesë e Policisë. Gjykata pranoi kërkesën e akuzën.
Kështu, më 24 Korrik, Gjykata e Vlorës caktoi “Detyrimi për tu paraqitur në policinë gjyqësore”, për 30-vjeccarin Medin Canaj, banues në Orikum, i dyshuar për kryerjen e veprës penale të “Shpërdorimi i detyrës, kryer në bashkëpunim. Ai rezulton i larguar nga Policia e Shtetit më 10 Maj.
Po ashtu, Gjykata vendosi “Pezullim i ushtrimit të një detyre ose shërbimi publik” për 4 efektivët: Renols Mataj, Endri Kasaj, Taulant Kasa, Armir Xhafaj, me detyrë trup shërbimi në seksionin urban dhe Interurban të Drejtorisë Vendore të Policisë Vlorë, të dyshuar për kryerjen e veprës penale të “Shpërdorimi i detyrës” kryer në bashkëpunim.
Ditën e djeshme (e Hënë), Drejtoria Rajonale e AMP Vlorë njoftoi se ka ekzekutuar vendimin e Gjykatës së Shkallës së Parë Vlorë.
Ndërkohë, hetimet vazhdojnë në lidhje me evidentimin e veprimeve dhe praktikave të tjera dhe personave të tjerë të implikuar në rastet e kundërligjshme të evidentuara deri tani.
