Nga Konventa e LSI, Ilir Meta, tha se do të rikthehet si President i Shqipërisë pas 25 vitesh, për të përfunduar mandatin e dytë.
Meta tha se kemi një situatë kritike, e cila kërkon një ndërhyrje urgjente të të gjithë qytetarëve, që duhet të marrin përgjegjësi, pasi nuk mundet më që tia besojnë përgjegjësitë e tyre, kësaj klase politike.
“Kam qenë në një lartësi ku kam parë çdo gjë, kam parë një rrezik të jashtëzakonshëm kanosës për sovranitetin e këtij vendi, për Pavarësinë e Kosovës, të fituar me aq shumë gjak e sakrifica, kam parë një plan për të ekzekutuar pluralizmin politik në Shqipëri, dhe për të pasur një fasadë, ku viktimat duhet të falenderojnë dhunuesit e përdhunuesit pse nuk i dhunojnë kaq shumë.
Mos prisni thjesht nga Ilir Meta, merrni përgjegjësitë tuaja, ndaj dhe ne duhet ti themi qytetarëve shqiptarë se ka vetëm 1 zgjidhje: të zbatohet Kushtetuta e Republikës së Shqipërisë”, tha Meta.
Ai vuri theksin te Referendumi, të cilin e konsideroi si një instrument në duart e popullit. Meta e konsideroi Lulzim Bashën një mashtrues ordiner, që dogji mandatet, bojkotoi zgjedhjet vendore, duke lënë vendin pa asnjë përfaqësues të opozitës.
“Djegia e mandateve ishte e planifikuar nga mafia që qeveris, nga oligarkët që punojnë me të dy palët”, tha Meta, duke shtuar se kjo që ka ndodhur sot, janë pasoja të këtyre vendimeve të papërgjegjshme. Ai tha se në 5 vite ndodhi një grusht shteti pa tanke, por me procedura, madje me ndihmen edhe të ekspertizës së huaj, duke tentuar të marrin edhe anëtarët e Gjykatës Kushtetuese me betime te noteria te Lana.
