Kreu demokrat, Sali Berisha, nga Fieri ku po zhvillon një takim me qytetarët, tha se Edi Rama po qëndron në pushtet në mënyrën më të paligjshme të mundshme.
Ai akuzoi Ramën se ka manipuluar zgjedhjet përmes bandave, presioneve, blerjes së votës dhe patronazhistëve.
“Duhet të përballemi me armikun më të keq të lirisë së shqiptarëve pas Enver Hoxhës deri sot, që është Edi Rama. Të shpallësh një kundërshtar armik nuk është e përshtatshme, por një kundërshtar që shkelmon dhe dhunon votën e qytetarëve, që ju heq anëtarëve të partisë së tij të drejtën e votës, dhe krijon një parti që nuk voton, e cila në të gjitha variantet s’mund të jetë kurrë demokratike. Mund të jetë ekstremiste e majtë, mund të jetë naziste apo fashiste, por vetëm parti e një harku kushtetues demokratik nuk mund të jetë. Këtu e ka sjellë Edi Rama shoqërinë shqiptare.
Ai nuk është më pak armik i demokratëve se sa është i vetë socialistëve që besojnë në lirinë, votën dhe rregullat e demokracisë”, tha Berisha.
Ai shtoi se reforma territoriale synon të rikthejë pushtetin te qytetarët.
Ai tha se kjo reformë u bë për interesa tërësisht elektorale, ndërsa theksoi se fondet po vidhen.
Duke u ndalur te afera e inceneratorëve, Berisha tha se si në Tiranë ashtu edhe në Fier janë dhënë miliona euro, por inceneratorët nuk ekzistojnë.
“Vjedhja pas vjedhje, për një km rrugë po paguhen 30 mln euro, këto janë taksat e qytetarëve. Edi Rama po vjedh secilin prej nesh dhe ne duhet ti japim një përgjigje të merituar”, tha Berisha.
Në vijim, ai u shpreh se ne e kundërshtojmë Ballkanin e Hapur, pasi kjo nismë është Jugosllavia e vjetër plus Shqipërinë.
“Këtë nuk e thotë Sali Berisha, por e ka thënë Aleksandar Vuçiç. Ne shndërrohemi në një vasal të Serbisë, po shkatërrohet bujqësia, pasi gjithçka vjen nga Serbia”, tha Berisha.
