Qeveria e Austrisë pothuajse në çdo kohë është cilësuar si një avokate e interesave të Shqipërisë në BE, ndërsa e ka mbështetur në rrugën drejt integrimit. Por duket se austriakët nuk kanë të njëjtin mendim, pasi vetëm 14 % e tyre mirëpresin Shqipërinë si anëtare të BE. Kjo është një nga shifrat më të ulëta të një vendi që konsidrohet mik dhe që ka dhënë suport për rrugëtimin e Shqipërisë në BE. Në qershor, teksa diskutohej statusi i vendit kandidat për Ukrainën, Kancelari austriak Karl Nehammer tha se BE nuk duhet të përdorte standarde të dyfishta krahasuar me vendet e Ballkanit Perëndimor.
Sondazhi i publikuar nga ‘DiePresse’, tregon se në korrik, vetëm 14% e austriakëve janë dakord me anëtarësimin e Shqipërisë në Bashkimin Europian. Sipas shifrave të sondazhit të realizuar nga ‘Gesellschaft für Europapolitik-Shoqëria për Politikë Europiane’, në muajin prill, kjo përqindje ishte 35.
Sa i përket Maqedonisë së Veriut, vetëm 20% e të anketuarve janë shprehur dakord në korrik për anëtarësimin e saj në BE, një rënie me 6% krahasuar me rezultatet e sondazhit të realizuar në prill të këtij viti.
Sipas ‘DiePresse’, ajo që befason më shumë në reagimin publik është se, pavarësisht linjës së pandryshuar të politikës austriake, tashmë që dy shtetet nisën zyrtarisht negociatat për anëtarësim, pëlqimi për përfshirjen e tyre në union-një gjë që parashikohet të ndodhë pas një dekade-ka pësuar rënie.
Nuk dihet se çfarë ka ndikuar kaq shumë në perceptimin e austriakëve në raport me Shqipërinë, por shkaqet mund të jenë të shumta dhe nisin që nga niveli i kriminalitetit, korrupsionit, varfëria dhe ndoshta mungesa e seriozitetit të institucioneve që përfaqësojnë vendin në arenën ndërkombëtare.
