Ilir Meta zyrtarisht largihet sot nga posti i Presidentit të Republikës, ndërsa vendin e tij në Presidencë për 5 vitet e ardhshme e zë, Bajram Begaj.
Dhe ashtu sikundër ka paralajmëruar edhe më parë, pritet që Meta të rikthehet në politikën aktive, duke iu bashkuar opozitës në betejat kundër regjimit të Edi Ramës.
Largimi i Metës nga Presidenca përkon me mbajtjen e Konventës Kombëtare nga LSI, parti e themeluar nga Presidenti që sapo ka mbyllur mandatin, ndërsa nuk dihet ende nëse ai do të marrë drejtimin e kësaj partie.
Në postimin e tij të fundit në rrjetet sociale, Meta ka zgjedhur që t’ju përgjigjet komenteve të qytetarëve, duke dhënë më shumë detaje për rrugën e tij të re. Ai ka shkruar se beteja të forta ka përpara, ndërsa një falënderim ka edhe për “popullin e 2 marsit”.
“Beteja të forta kemi përpara. Por a mund të arrish në maja pa bërë edhe pak malore? Malet tona më të larta! Një agim i ri nis nesër që do të rikthejë demokracinë dhe Llogaridhënien”, ka shkruar presidenti Meta.
“E ndjeja përkrahjen e të gjithë shqiptarëve të ndershëm. Mirënjohje në veçanti për popullin e 2 Marsit për ndërgjegjen e lartë patriotike që tregoi”, shkroi Meta.
