Këtë herë, kryeministri Edi Rama nuk hapi shampanjë për të festuar hapjen e negociatave me BE siç bëri disa vite më parë (dhe pse negociatat asokohe nuk u hapën). Megjithatë, për të sjellë atmosferën festime për “suksesin e qeverisë” duket se ka menduar kryebashkiaku i Tiranës, Erion Veliaj.
Ky i fundit, përmes një postimi në rrjetet sociale ka njoftuar mbajtjen e një koncerti në kryeqytet më datën 28 korrik.
Koncerti në Sheshin “Skënderbej” siç shpjegon Veliaj, do të zhvillohet për të festuar dy ngjarje, sipas tij, të mëdha:
Çeljen e negociatave me BE-në dhe 100-vjetorin e marrëdhënieve SHBA-Shqipëri.
“Viti i hapjes së negociatave për anëtarësimin në Bashkimin Europian është një vit historik për ne shqiptarët – një hap më afër familjes së madhe europiane, aty ku na takon të jemi. Por, ky vit, në 28 Korrik, shënon edhe një çast historik për marrëdhënien që kemi me aleatin tonë të madh: 100-vjetorin e lidhjes sonë speciale me Shtetet e Bashkuara të Amerikës. Merr familjen dhe eja në 28 Korrik, ora 19:00, në Sheshin “Skënderbej”, për të festuar së bashku këto dy ngjarje të mëdha për shqiptarët e Shqipërinë, në një koncert fantastik me emrat më të mirë të muzikës sonë”, shkruan Veliaj në rrjete sociale.
Për opozitën dhe zëra të spikatur të opinionit publik, hapja e negociatave ishte më shumë inerci sesa meritë e qeverisë së drejtuar nga Edi Rama. Madje, PD e ka akuzuar kreun e qeverisë për vonesë disavjeçare në këtë aspekt.
