Pesë persona janë arrestuar në Elbasan për një rast korrupsioni, mes tyre gjyqtarja Zamira Vyshkja dhe avokati Ilir Pashaj.
Fakti penal i hetuar, sipas SPAK, lidhet me një rast të korrupsionit në sistemin e drejtësisë në qytetin e Elbasanit, ku familjarë të një shtetasi të arrestuar në bashkëpunim me avokatin mbrojtës, i kanë ofruar gjyqtarit të çështjes një shumë monetare me qëllim favorizim në caktimin e masës së dënimit.
Hetimet kanë nisur në 2021, për veprat penale “Korrupsioni aktiv i gjyqtarit, prokurorit dhe funksionarëve të tjerë të drejtësisë”, në bashkëpunim, “Korrupsionit pasiv i gjyqtarit, prokurorit dhe funksionarëve të tjerë të drejtësisë” dhe “Moskallëzimi i krimit”.
Prokuroria e Posaçme i është drejtuar GJKKO me kërkesë për caktimin e masave të sigurimit. Një ditë më parë, Gjykata e Posaçme ka vendosur caktimin e masave të sigurimit personal për 5 persona.
Këtë të Premte, nga ana e Drejtorisë së Përgjithshme të Policisë së Shtetit është bërë ekzekutimi i vendimit të gjykatës për caktimin e masave të sigurimit.
Është ekzekutuar masa e sigurimit “Arrest në shtëpi” për Zamira Vyshkjan, me detyrë gjyqtare në Gjykatën e Rrethit Gjyqësor, Elbasan.
Janë ekzekutuar masat e sigurimit “Arrest në burg”, për Ilir Pashajn, me detyrë avokat mbrojtës, si dhe për Taulant Ramollarin dhe Xhulio Musajn.
Po ashtu, është ekzekutuar masa e sigurimit “Arrest në shtëpi” për shtetasin Adrena Tirana.
Ka dyshime se gjyqtarja i kishte kërkuar familjarëve të Xhulio Musait, Taulant Ramollari dhe Adrena Tirana, një shumë prej 4 milionë lekësh, që i riu t’i shpëtonte dënimit. Përmes avokatit Pashaj, familjarët e të riut nuk kanë pranuar që t’i japin atë shumë gjyqtares, por vetëm 2 milionë lekë. Ka dyshime se gjyqtarja nuk ka pranuar këtë shumë dhe më pas ka dënuar për veprën e plagosjes Musain.
Ndërkohë, nga kontrollet e ushtruara në zyrën dhe banesën e saj, deri më tani nuk raportohet që të jenë gjetur shuma parash apo sende të paligjshme.
Gjyqtarja që tashmë ndodhet në arrest shtëpie, nuk e ka kaluar vettingun. Ndërkohë, avokati Ilir Pashaj, ka qenë gjyqtar në gjykatën e Elbasanit deri në 2017, kur dhe ka dhënë dorëheqjen ditën e fundit të dorëzimit të formularit të vettingut.
