Eneo Bitri është padyshim një nga pikat më të forta në mbrojtjen e Partizanit, por ka shumë shanse që të kuqtë të bëjnë pa të në sezonin e ardhshëm.
Forma e mirë e treguar dhe aftësitë në të dyja fazat e lojës e kanë bërë Bitrin një emër mjaft të kërkuar në merkato, me izraelitët e Hapoel Tel Aviv, që kanë bërë lëvizje konkrete.
Ata kanë ofruar 100 mijë euro për beratasin, teksa Partizani nuk është i gatshëm për ta lënë të lirë për këtë shifër.
Gjithsesi, zhvillimet e fundit pranë klubit të kuq e afrojnë Bitrin me izraelitët. Burime për gazetën bëjnë me dije se negociatat mes klubeve janë në rrugën e duhur dhe pritet që Bitrit t’i jepet fletëdalja.
Akordi nga ana e lojtarit është më i lehtë dhe pritet të vijë më shpejt se marrëveshja mes klubeve.
Largimi i Bitrit do ta detyronte Partizanin të hynte në garë për të firmosur me një tjetër qendërmbrojtës të nivelit të lartë.
Që nga ardhja e tij në janar, Bitri ishte pikë kyçe në rritjen e skuadrës dhe eliminimin e gabimeve të njëpasnjëshme në difensivë. /Panoramasport
