Klubi i Tiranës ka përfituar të ardhura të ndjeshme nga fitorja e titullit kampion dhe pjesëmarrja në kompeticionet europiane në këtë sezon. Por bardheblutë do të përfitojnë shuma të tjera me shitjen e disa prej yjeve të skuadrës, të cilët prej kohësh janë vënë nën shënjestrën e klubeve nga kampionate të tjera. Një prej të padiskutueshmëve për Orges Shehin, po bëhet gati t’i japë lamtumirën skuadrës bardheblu, pasi do të vazhdojë karrierën e tij në Ukrainë.
Burime të “Panorama Sport” pranë klubit bardheblu kanë konfirmuar se Enur Totre do të largohet pas vetëm një viti në kryeqytet. Mesfushori nga Maqedonia e Veriut ishte një nga elementët kyç të Tiranës që u shpall kampione në edicionin e kaluar dhe ka tërhequr vëmendjen e shumë klubeve. Në fund, ka qenë Vorskla Poltava që ka bërë ofertën e duhur për bardheblutë me 250 mijë euro që do të kalojnë në arkat e këtij klubi si pagesë fikse dhe me bonuse të tjera në varësi të arritjeve.
Vetë Totre do të firmosë për tre vite për skuadrën ukrainase, teksa do të përfitojë një rrogë prej rreth 200 mijë eurosh në sezon. Pranë tij ishte edhe klubi i Shakhtar Soligorsk, por ai ka preferuar ofertën ukrainase, pavarësisht situatës që po përjetohet në këtë vend për shkak të pushtimit rus.
