Presidenti serb Aleksandar Vuçiç ka reaguar, pasi qeveria kroate ia ka ndaluar atij të vizitojë Jasenovacin dhe Pakracin.
Vuçiç publikoi një foto në Instagramin e tij personal dhe shkroi edhe një mesazh të fortë.
“Ju vazhdoni dhe bëjeni punën tuaj. Populli serb do të vazhdojë të jetojë e kurrë nuk do të harrojë”, shkruan ai.
Qeveria kroate deklaroi se presidenti serb donte që të krijonte kaos në Kroaci.
Pa njoftim zyrtar të autoriteteve kroate, pa koordinim me ambasadën, Vuçiç kishte dashur ta kalonte kufirin nga Bosnjë e Hercegovina, përkatësisht entiteti i saj Republika Srpska dhe të mbërrinte në Jasenovac rreth orës 11:00 dhe më pas në Pakrac rreth orës 14:00.
Vuçiç, sipas burimeve nga qeveria e Plenkoviçit, kishte kontaktuar me kryetarin e partisë serbe, SDSS, Milorad Pupovac të cilit i kishte treguar se po planifikonte një vizitë private në Jasenovac, në zonën përkujtimore ku vdiqën shumë serbë në Luftën e Dytë Botërore.
Ai e kishte ftuar Pupovacin që t’i bashkohej dhe kishte thënë se, nëse e konsideronte të nevojshme, do ta informonte qeverinë kroate për vizitën e tij, gjë që e bëri Pupovac dhe qeveria kroate, siç shkruan Jutarnji, u trondit nga mënyra se si presidenti serb kishte planifikuar të krijonte kaos në Kroaci.
