Një avion serb Antonov-12 është rrëzuar mbrëmjen e djeshme në Kavalla të Greqisë. Avioni dyshohet se ishte ngarkuar me 12 ton municione, ndërsa nga informacionet e para dyshohet se në bord ndodheshin 8 persona pjesë e ekuipazhit.
Shpërthimet, zjarret dhe tymi i dendur tronditën zonën e Kavallës gjatë natës ndërsa alarmi është ngritur për tymin e përhapur në zonë pasi nuk dihet ende përmbajtja e substancave që janë lëshuar në ajër pas ngjarjes.
Banorët e zonës janë njoftuar të mbajnë dyer dhe dritare të mbyllura dhe madje të mos përdorin as kondicionerët derisa të bëhet vlerësimi i sigurt i situatës.
As ekipet e shtëpimit nuk i janë afruar pikës së shpërthimit më shumë se 50 metra ku kanë konstatuar një substancë të bardhë, e cila shkakton djegie në sytë dhe buzët e atyre që afrohen pranë saj.
Marios Apostolidis koordinator i shërbimeve zjarrfikëse të Greqisë së Veriut, foli për fillimin e operacioneve, duke shpjeguar se tashmë janë ngritur dronët dhe kanë filluar të operojnë piroteknikët e Ushtrisë për të dhënë “OK”, ose ndalimin në varësi të gjetjeve.
“Ka shpërthime të vogla zjarri, në një rreze prej të paktën 500 metrash. Kemi ndaluar hyrjen në zonën ku operojmë, banorët janë këshilluar të mos afrohen, të kenë kujdes dhe të mbajnë dritaret të mbyllura”, tha fillimisht Apostolidis.
“Kur vendi të jetë i sigurt, ne do të hyjmë në fushë. Nuk ka ende foto nga droni, tani është ngritur. Jemi afruar me maska deri në 50 metra, kemi parë një pjesë të avionit, ka shumë materiale të shpërndara nëpër fusha”, shtoi ai.
Si u rrëzua avioni Antonov An-12 në Kavalla
Burime pranë Shërbimit të Aviacionit Civil (CAA) bëjnë të ditur se piloti i Antonov An-12 ka informuar se avioni ka pësuar një defekt në motor dhe ka kërkuar leje për ulje emergjente, por nuk ka arritur të shkojë në aeroport, pasi zjarri ka rënë në motor në fluturim dhe avioni u rrëzua.
AAC-ja është në pritje të planit të fluturimit edhe nga shërbimi përkatës i Serbisë. Avioni u rrëzua mes fshatrave Antifilippoi dhe Palaiohori, në Eleftheroupoli të Kavallës. Ngarkesa e Antonov fillimisht u klasifikua si “e rrezikshme”. Më vonë u bë e ditur se avioni mbante dymbëdhjetë ton eksploziv.
Shtabi i Zjarrfikësve kërkoi tërheqjen e menjëhershme të të gjitha forcave të Shërbimit Zjarrfikës, si dhe të gjithë atyre që ndodhen pranë zonës rurale të Paleochorit, ku u rrëzua avioni Antonov An-12, siç deklaroi kreu i Mbrojtjes Civile.
Siç tha Kivrakis, është dhënë urdhër për largimin e menjëhershëm të të gjitha forcave që ruajnë zonën pasi nuk dihet toksiciteti i ngarkesës së transportuar nga avioni, ndërsa në vendin e aksidentit pritet që një ekip piroteknikë të kontrollojë rrezikshmërinë e ngarkesës dhe të vendosë për hapat e mëtejshëm të operacionit.
“Heshtja” nga Serbia
Asnjë njoftim zyrtar nuk është bërë deri më tani nga autoritetet në Serbi në lidhje me aeroplanin transportues Antonov. Mediat nga Serbia transmetojnë raporte nga mediat greke.
Sipas faqeve të mediave serbe, dëshmitarët okularë që jetojnë pranë aeroportit të Nishit raportuan se kishin parë avionin të ngrihej mbrëmë. Disa thanë se u bëri përshtypje fakti që “kishte një rrjedhë disi të pabarabartë “. Gazeta Politika raporton se ” avioni i përkiste një kompanie private amerikane dhe ishte i regjistruar në Ukrainë”.
Sipas mediave serbe, shumë pyetje rrethojnë ngarkesën e transportuar nga avioni. Ka mundësi që ai të transportonte materiale ushtarake. Duhet theksuar se Serbia kryesisht eksporton municion në vende të ndryshme të Lindjes së Mesme .
