Një atentat me armë ka ndodhur pas orës 14:00 në zonën e Fushë Krujës. Nga raportimet paraprake mësohet se ndaj një automjeti është qëlluar me armë zjarri, ndërsa mjeti është përfshirë nga flakët.
Sipas të dhënave paraprake ngjarja ka ndodhur pranë Urës së Fushë Krujës, ndërkohë që dyshohet për 3 viktima. Nga të dhënat e raportuara, në drejtim të automjetit është qëlluar me breshëri automatike.
Dy viktima kanë mbetur të bllokuar në makinën e qëlluar me armë dhe më pas i është vënë zjarri.
Një prej viktimave ka dalë nga makina, por nuk ka shenja jete ndërsa dy persona të tjerë ndodhen brenda makinës që është përfshirë nga flakët.
Nga targat e mjetit rezulton se mjeti është në pronësi të një personi me banim në Fushë Kuqe. Nuk dihet ende nëse pronari ishte në makinë dhe kush ishte shënjestra e këtij atentati.
Në zonë ka shkuar Policia e cila ka rrethuar vendngjarjen dhe po punon për gjetjen e autorëve. Ende nuk ka detaje se kush është personi që humbi jetën në këtë atentat.
