Policia e Pogradecit kanë proceduar penalisht në gjendje të lirë 3 persona për akuzën e ndërtimit të paligjshëm.
Këta persona janë hetuar pas kallëzimit të një gruaje e cila i ka akuzuar se kanë dëmtuar bashkëshortin e saj gjatë punës me ta.
Sipas bluve, këta shtetas ishin duke ndërtuar një xhami, ku është dëmtuar edhe SB., ndërkohë që policia ka zbuluar se punimet po kryheshin pa leje.
“Specialistët për Hetimin e Krimeve në Komisariatin e Policisë Pogradec referuan materialet në Prokurori dhe filloi procedimi penal në gjendje të lirë për shtetasit B. Xh., 41 vjeç; E. B., 50 vjeçe dhe S. B., 57 vjeç, banues në Pogradec dhe fshatin Memëlisht, Pogradec për veprat penale “Punësimi i paligjshëm”; “Fshehja e të ardhurave”; “Shkelja e rregullave të mbrojtjes në punë”; “Ndërtimi i paligjshëm”; “Deklaratat e rreme përpara oficerit të policisë gjyqësore”. Procedimi penal ndaj tyre filloi pas kallëzimit të bërë nga shtetasja E. B., për dëmtimin e bashkëshortit të saj, shtetasit S. B., në datën 06.07.2022.
Shtetasi S. B., punëtor i një subjekti me administrator shtetasin B. Xh., kishte dëmtuar syrin gjatë punimeve të kryera në një objekt kulti (xhami), në fshatin Petrushë, Pogradec. Nga verifikimet e kryera rezulton se këto punime ishin pa leje dhe se shtetasi S. B. ishte punëtor i pasiguruar në këtë firmë. Ditën e ngjarjes, të dy bashkëshortët, shtetasit E. B. dhe S. B. kanë dhënë deklaratë të rremë përpara oficerit të policisë gjyqësore, duke e kallëzuar dëmtimin fizik të shtetasit S. B., si aksidental”, njofton policia.
