Një i paraburgosur ka tentuar të vrasë vetën në qelitë e komisariatit të Korçës, konfirmoi policia lokale.
“Rreth orës 13:05, në Komisariatin e Policisë Korçë, në dhomat e paraburgimit, ka tentuar të varë veten me batanije shtetasi A.M., 27 vjeç, banues në Tiranë, i arrestuar një ditë më parë si i dyshuar për veprën penale ‘Ndihma për kalim të paligjshëm të kufijve’”, njoftoi policia.
Në momentin e tentativës për të varur veten është konstatuar nga punonjësi i shërbimit, i cili ka ndërhyrë menjëherë, shtuan të njëjtat burime.
Aktualisht raportohet se A.M., ndodhet jashtë rrezikut për jetën, ndërsa grupi hetimor po punon për të sqaruar rrethanat e ngjarjes.
Sipas një njoftimi të një dite më parë të policisë, i riu u ndalua për veprat penale “Ndihma për kalim të paligjshëm të kufijve” kryer në bashkëpunim dhe “Mosbindja ndaj urdhrit të punonjësit të policisë së rendit publik”.
Ai u kap duke transportuar refugjatë me mjet dhe nuk i ndaloi thirrjes së bluve për të ndaluar mjetin. 27-vjeccari, sipas burimeve zyrtare, u arrestua pas një ndjekjeje.
“Shërbimet e Policisë kanë konstatuar shtetasin A. M., në dalje të qytetit të Pogradecit, duke drejtuar mjetin tip ‘Volkswagen’, me të cilin kishin dyshime se po transportonte emigrantë të paligjshëm. Pas shenjës për ndalim nga punonjësit e Policisë, shtetasi A.M. nuk i është bindur urdhrit për të ndaluar dhe është larguar me shpejtësi. Shërbimet e Policisë janë vënë në ndjekje të mjetit dhe bënë të mundur ndalimin e tij në fshatin Piskupat, Pogradec, në momentin kur drejtuesi tentoi të braktiste mjetin”, njoftoi policia.
“Nga kontrolli i ushtruar në automjet u gjetën shtetasi E.N., i cili dyshohet të jetë bashkëpunëtori i shtetasit A.M., në transportimin e 4 emigrantëve të paligjshëm, të cilëve kundrejt shpërblimit 1100 euro secilit, iu ishte premtuar kalimi drejt vendeve të BE-së”, shtuan të njëjtat burime.
