Kreu i SPAK, Arben Kraja, tha se gjatë vitit 2021 janë kryer hetime të suksesshme dhe bashkëpunimi me Policinë e Shtetit është në nivele të larta. Kraja ishte prezent në Kuvendin e Shqipërisë ku lexoi para deputetëve raportin e veprimtarisë së institucionit që ai drejton për vitin 2021. Kraja u shpreh se, SPAK ka konfiskuar pasuri me vlerë 70 milionë Euro gjatë vitit të kaluar.
Gjatë vitit 2021, Prokuroria e Posaçme ka patur një rol mjaft aktiv si institucion kontribues dhe raportues në zbatim të planit të veprimit të grupit të shqyrtimit të bashkëpunimit ndërkombëtar. Në lidhje me veprën penale të pastrimit të produkteve të veprës penale duhet theksuar se kjo vepër e parashikuar nga neni 287 i Kodit Penal nuk është në kompetencë lëndore të hetimit të SPAK. Kjo vepër penale hetohet nga SPAK vetëm kur kryhet nga grupe të strukturuara kriminale, organizata kriminale, organizata terroriste dhe banda të armatosura, ose nga subjekte të posaçme sipas parashikimeve të nenit 75/a. Gjatë vitit 2021 janë regjistruar 15 procedime penale ku përfshihet hetimi edhe i veprës penale të pastrimit të produkteve të veprës penale. Janë hetuar 25 persona Janë përfunduar dhe dërguar për gjykim 3 procedime penale me 7 të pandehur ndërkohë janë dënuar 11 të pandehur duke u deklaruar fajtorë nga gjykata si dhe janë konfiskuar produkte të veprës penale, pasuri të luajtshme dhe të paluajtshme me vlerë 70 mln euro”, u shpreh Kraja.
Në lidhje me hetimet pasurore për sekuestrimin dhe konfiskimin e aseteve kriminale gjatë vitit 2021, SPAK ka vepruar në 3 drejtime kryesore. Në zbatim të ligjit antimafia gjatë vitit 2021 janë verifikuar 316 materiale pasurore, janë paraqitur dhe miratuar nga gjykata 14 kërkesa për sekuestrim pasurish dhe janë paraqitur 4 kërkesa për konfiskim pasurish. Në zbatim të aktit normativ, e quajtura OFL, SPAK ka paraqitur në gjykatë 25 kërkesa për sekuestrim pasurie dhe 72 kërkesa për konfiskim pasurish të ndryshme”, tha ai.
Kraja bëri të ditur se më 18 Mars ka filluar të operojë zyra e përgjimit në mjediset e SPAK pasi më parë ky proces kryhej në ambientet e Prokurorisë së Përgjithshme. Kraja tha se Prokuroria e Posaçme ka përdorur metodën e përgjimit për 129 procedime penale.
