E ndërsa një ditë më parë në fletoren zyrtare u publikua vendimi i ERE-s që përcaktonte çmimin e shitjes së energjisë elektrike nga inceneratori i Elbasanit, të kërkuar nga firma nën sekuestro, të tjera fakte dalin në dritë mbi skandalin që merr përmasa gjithnjë e më të mëdha.
Në vendimin e publikuar bëhet me dije se ALBTEK depozitoi në ERE kërkesën për miratimin e çmimit të energjisë në 12 maj të këtij viti, ndërkohe që kishte gjashtë muaj në sekuestro preventive. Vendosja e çmimit të energjisë u morr nga ERE mbi bazën e regjistrave kontabël të një shoqërie të quajtur “Consulting SE Partners”.
“Gjatë administrimit të kësaj shoqërie nga dokumenti financiar i vënë në dispozicion nga shoqëria “Consulting SE Partners” shpk e cila mban regjistrat kontabël të shoqërisë “Albtek Energy” shpk u konstatua se është i nevojshëm përcaktimi i cmimit të energjisë elektrike prodhuar deri në momentin e marrjes në administrim nga ana e saj”.
Po kush qëndron pas kesaj shoqërie?
Në një kërkim të thjeshtë në QKB shfaqet qartë sërish emri i Stela Gugalljes, administratorja e albtek energji e shpallur në kerkim ndërkombetar, ndaj të cilës GJKKO ka vendosur edhe masën “arrest me burg”.
Shoqëria që rezulton ende me status aktiv ka dy administratore Stela Gugallja me 80% të aksioneve dhe Julia Demnerin me 20% të aksioneve. Pra ERE jo vetëm miratoi kërkesën e shoqërisë nën sekuestro, por e beri këtë mbi bazën e bilanceve të pronares në kërkim ndërkombëtar. Kjo ka ndodhur edhe me ndikimin direkt të ministrisë së infrastrukturës dhe energjitikës, raporton Fax news.
Vendimi i ERE-s zbulon dhe një shkresë që kishte marrë nga ministria që drejtohet nga Belinda Balluku.
“Ministria e Infrastrukturës dhe Energjisë në shkresën e 6 qershorit 2022 i ka kërkuar ERE-s trajtimin e kërkesës së subjektit për përcaktimin e cmimit të shitjes së energjisë elektrike të impiantit të trajtimit të mbetjeve urbane në Elbasan nga shoqëria “Albtek Energy” referuar kostove të operimit të impiantit”.
Vendimi i plotë nga ERE mund të aksesohet duke klikuar: këtu.
