Nga Boldnews.al
Gjykata po liron një nga të arrestuarit me urdhër të Prokurorisë, në kuadër të operacioneve lidhur me tokat dhe ndërtimet në Sarandë.
Vasil Lango, 37 vjeç, përgjegjës i Sektorit të Hartografisë në ASHK Sarandë ka lënë qelitë e paraburgimit të Sarandës, pas vendimit të gjyqtarit Fatmir Ndreu për t’i ndryshuar masën e sigurisë nga “arrest në burg” në “arrest në shtëpi”.
Tashmë nga 4 të arrestuarit e operacionit “Heshtja 2” të finalizuar me urdhër të Prokurorisë së Sarandës në datë 24 mars të këtij viti, pas denoncimit të ministrit Ulsi Manja, në burg ka ngelur vetëm hartografi Saimir Braho.
Tre të arrestuarit e tjerë Andri Dhima, Vasil Lango dhe Erliton Ymeri janë liruar dy nga gjyqtari Fatmir Ndreu dhe i treti nga Gjykata e Apelit Gjirokastër.
Madje në total, nga 19 urdhër-arreste të nxjerra në tre raste nga Prokuroria e Sarandës dhe në një rast nga SPAK lidhur me tokat dhe ndërtimet në Sarandë, në “arrest në burg” kanë ngelur vetëm 3 persona, 2 jane në “arrest në burg me afat 45 ditë”, afat ky që mbaron për 1 javë, 7 janë në “arrest në shtëpi” të liruar nga Gjykata e Sarandës dhe Apelit si dhe 7 janë ende persona në kërkim.
Gjykata duket se ka sfumuar kështu operacionet e Prokurorisë së Sarandës dhe SPAK, të cilët brenda 5 muajve nxorrën 19 urdhër-arreste me masë “arrest në burg”.
Zbulohet standarti i dyfishtë, si gjyqtari dha dy masa të ndryshme brenda pak orësh
Një element i çuditshëm është zbuluar në vendimet e gjyqtarit Fatmir Ndreu. Në 6 korrik në këtë gjykatë është regjistruar kërkesa për zëvendësim mase e përgjegjësit të Hartografisë, Vasil Lango.
Një ditë më pas, në 7 korrik është regjistruar kërkesa e hartografit Saimir Braho. Seanca për shqyrtim u lanë në 8 korrik për Langon dhe në 12 korrik për Brahon. Në 8 korrik gjyqtari Ndreu shtyn seancën për Langon për në datën 12 korrik, 1 orë para seancës së Saimir Brahos.
Në datën 12 korrik, gjyqtari shtyn sërish seancën për Langon për një ditë më vonë, ndërsa 1 orë më pas refuzon kërkesën e Brahos për masë më të lehtë sigurimi. Të nesërmen, gjatë shqyrtimit të kërkesës për Langon, pranon zëvendësimin e masës për të.
Tashmë për një dosje me 4 të arrestuar, mbahet në burg vetëm 1 person.
