Kreu demokrat Sali Berisha u shpreh pasditen e sotme se Qeveria do të përballet me revoltën qytetare, pasi SPAK po i ve kapakun skandaleve dhe aferave të mëdha të kësaj qeverie.
Ai tha se kjo qeveri nuk do të mund të shpëtohet nga SPAK dhe të jeni të bindur se do të përballet me popullin, pasi ne do i dalim zot vetes dhe vendit. Kreu i PD tha se protesta e 7 korrikut ka forcë të pathyeshme.
Berisha tha se nëse SPAK do të vepronte atëherë kjo Qeveri do të binte dhe ata që kanë shkelur ligjin dhe kanë vjedhur do të përballeshin me drejtësinë.
Lidhur me ngjarjen e Elbasanit, 4 ditë para zgjedhjeve të 25 prillit, Berisha tha se oficeri i RENEA qëlloi në kushtet e vetëmbrojtjes, por drejtësia me mënyrën si po vepron kërkon të mbrojë bandën që është në Parlament.
“Protestat nuk ndalen më. 7 korriku ishte hapi i parë, opozita në këmbë, por protestat kur të fillojnë nuk ndalen, do jenë forma të shumëllojta. Kjo qeveri duhet të ikë. S’mund ta mbrojë më SPAK këtë qeveri.
Jo! Do përballet me popullin. SPAK-u është bërë kapaku i të gjitha vjedhjeve të tyre. Ka 4-5 muaj që ka dalë çështja e inceneratorëve, çdo ditë Erion Veliaj me bandën e tij merr 80 mijë euro në ditë nga thesari, nga paratë e taksapaguesve, nga ata që janë në kërkim gjoja, Zoto, Mërtiri, Gugallja.
Nuk ka cinizëm më ekstrem të kësaj drejtësie ndaj qytetarëve shqiptarë. Si mund t’ua japë paratë njerëzve në kërkim? Ua jep sepse ata kanë në thes Edi Ramën, Engjëll Agaçin, Arben Ahmetajn, Erion Veliajn. Tallen me ne, bëjnë teatër. A do të pranojmë që ata të bëjnë teatër? Jo! Ne kemi detyrime ndaj qytetarëve, do t’i përmbushim ato. Nëse drejtësia do të vepronte, ne do vlerësonim, por këtu drejtësia përdoret për të vënë kapak”, tha Berisha.
