Presidenti Ilir Meta ka pritur sot në një takim dy zyrtarë të Bashkisë Arbëreshe të Ururit duke thënë se takimi me përfaqësues të këtij komuniteti është përherë emocionues.
Kreu i Shtetit thekson se jetik që arbëreshët të ndihmohen dhe mbështeten, me qëllim që ata të mbrojnë dhe forcojnë identitetin kombëtar.
Presidenti thote se ka pranuar ftesën për të vizituar Bashkinë e Ururit, ndërsa thekson se “do të kontribuojë me shumë dashuri për pasurimin e bibliotekës së saj me libra dhe botime në gjuhën shqip”.
“Takimet me përfaqësues të komunitetit shumë të dashur arbëresh janë gjithmonë emocionuese. I lumtur të prisja ngrohtësisht Nënkryetarin e Bashkisë Arbëreshe të Ururit, Molise, Emiliano Plescia dhe Këshilltarin për Kulturën të kësaj Bashkie, Roberto Anzivino.
Është mbresëlënëse dhe frymëzuese të njihesh me përpjekjet e tyre për të trashëguar brez pas brezi gjuhën, kulturën dhe traditat e “Motit të Madh” të Gjergj Kastrioti Skënderbeut, që meritojnë sa më parë të bëhen pjesë e UNESCO.
Jetike për mbrojtjen dhe forcimin e identitetit tonë kombëtar të mbështesim dhe ndihmojmë arbëreshët të ruajnë këtë pasuri të vyer historike dhe kulturore, vlerë e përbashkët e Shqipërisë dhe Italisë mike.
E mirëprita me shumë kënaqësi ftesën për të vizituar Bashkinë e Ururit dhe do të kontribuoj me shumë dashuri për pasurimin e bibliotekës së saj me libra dhe botime në gjuhën shqipe”, shkruan Meta.
