Nga Boldnews.al
Abonentët e kompanisë celulare “One”, sidomos ata që janë me kontratë dhe që kanë zgjedhur këtë fillim-Korriku për të pushuar disa ditë jashtë Shqipërisë, janë përballur me një situatë tërësisht absurde dhe të papritur.
Shoqëria u ka ndërprerë shërbimin telefonik në mënyrë të njëanshme, të papritur, pa asnjë njoftim paraprak dhe abuzive.
Dhjetra denoncime të ngjashme janë shpërndarë në rrjete sociale dhe ankesa të ngjashme kanë mbërritur edhe në adresën e “Boldnews.al”.
Këto denoncime janë thuajse të ngjashme dhe situata është shumë e thjeshtë, por shumë nerva-shkatërruese për klientët e “One”.
Në çdo fillim muaji, abonentët me kontratë njihen me faturën e shpenzimeve të muajit parardhës. Kjo faturë duhet paguar maksimumi deri në datën 25 të muajit pasardhës.
Po ashtu, siç ndodh normalisht në çdo periudhë të vitit, në të njëjtën mënyrë faturohet edhe pagesa për shërbimin “Roaming”.
Pra, qytetarët që kanë numër me kontratë dhe që përdorin telefonin jashtë Shqipërisë, e paguajnë shërbimin në faturën e vetme, së bashku me shpenzimet mujore normale.
Por, kjo rrjedhë rutinore dhe normale, duket se është “prishur” nga kompania “One” për këtë sezon veror, duke i vendosur klientët në një situatë bllokuese.
Çfarë ka ndodhur?
Për abonentët që kanë zgjedhur që të udhëtojnë jashtë Shqipërisë në këtë fillim korriku, kompania “One” ka paraqitur disa oferta për shërbimin “Roaming”, i cili u lejon abonentëve që të kryejnë telefonata, kudo ku ata ndodhen.
Për këto oferta, kompania ka vendosur tarifat përkatëse. Por, në asnjë rast, klientët nuk janë njoftuar se këto oferta janë me limit dhe tejkalimi i tyre shoqërohet me bllokimin e komunikimit telefonik.
Shumë abonentë të “One” kanë marrë mesazhin telefonik nga kompania se numri është bllokuar, për shkak të detyrimeve të pashlyera.
Dhe, në këtë mesazh gjenden absurditete të tjera.
Kompania llogarit në ato që i konsideron “detyrime të pashlyera” vlerën e faturës së muajit të kaluar (Qershorit), që ka afat pagese deri në 25 Korrik, si edhe vlerën “e tejkaluar” të Roaming, për të cilën nuk ka njoftuar paraprakisht klientët.
Aq më tepër kur pagesa për shërbimin “Roaming” të përdorur gjatë Korrikut ka afat për t’u paguar deri në 25 Gusht.Me këtë “mbledhje mekanike” shifrash, por aspak logjike, kompania ‘One” i jep të drejtën vetes që të bllokojë në mënyrë të njëanshme komunikimin e klientëve të saj.
Shërbimi ndaj klientit i kompanisë “One” vijon më tej me cinizmin dhe abuzimin.
Ankesat e klientëve për bllokimin e njëanshëm të numrave telefonikë u përgjigjet me sugjerimin: “Njoftoni të afërmit tuaj në Shqipëri që të paguajnë për ju tarifën e tejkaluar të shërbimit Roaming dhe numri do t’ju zhbllokohet menjëherë”.
Pra, për një sjellje tërësisht abuzive të sajën, kompania ofron “zgjidhje” të çuditshme-shqiptarët turistë jashtë vendit, të cilët kanë udhëtuar për të shijuar disa ditë qetësi, duhet të shqetësojnë edhe familjarët e tyre në Shqipëri për të bërë pagesën e faturës telefonike, të atij detyrimi që ka afat deri në 25 Gusht.
Marrëdhënia ndërmjet qytetarëve shqiptarë dhe kompanive telefonike nuk është aspak më e mira e mundshme.
Klientët shqiptarë trajtohen si klientë të dorës së dytë nga kompanitë që kontrollojnë tregun, ndërkohë që autoritetet rregullatore nuk kanë as forcën dhe as vullnetin për t’u gjendur në krah të qytetarëve.
Në Shqipëri ekziston një situatë oligopoli në tregun e telefonisë celulare, ku kompania hungareze “4IG”, e cila zotëron shoqërinë “One”, zotëron më së paku 57 për qind të hapësirës.
Mesa duket, kjo situatë komode në treg, i jep të drejtën shoqërisë ‘One” që të sillet me klientët në mënyrë abuzive, siç është rasti i denoncimeve që përcollëm më lart.
