Deputeti Belind Këlliçi u shpreh mbrëmjen e sotme në emisionin “Open” se kauzat e opozitës nuk do të shiten më dhe as do të lihen në mes të rrugës.
Këlliçi tha se aksionet politike që do të nisin do t´i çojmë deri në fund, pa lënë në mes kauzat, ashtu sikundër ka ndodhur deri më sot.
“Kemi një opozitë sot që ka si lider Sali Berishën, politikanin që njeh më mirë se kushdo tjetër forcën e protestave. Kjo protestë që do të mbahet nesër mund të them se është e vonuar, duhet të tregojmë se jemi opozitë e fortë, që ka një kurs të ri, që i shkon deri në fund kauzave”, tha ai.
I pyetur lidhur me protestën që do mbahet ditën e enjte dhe vijimin e saj, Këlliçi tha se gjithçka do të varet nga ajo se si do të shkojë kjo protestë, si do të reagojnë qytetarët.
“Shumë gjëra lidhur me atë se si do të vijohet mund t´ju them se do të vendosen nesër, pra do të vendosim nëse do të ketë një protestë tjetër të shpejtë, apo si do të vijohet. Ajo që dihet është se aksioni opozitar do t´i shkojë deri në fund kauzave”, tha ai.
