Mesfushori Herald Marku pas një sezoni te Partizani është rikthyer sërish te Vllaznia. Mesfushori ka folur për faqen zyrtare të shkodranëve, duke treguar se ishte një zgjedhje zemre rikthimi, aty ku fitoi edhe Kupën e Shqipërisë.
“Kam pasur një sezon me ulje-ngritje te Partizani. Pas një bisede me drejtuesit e klubit, mendova që më e mira ishte që të shkëpusja bashkëpunimin. Zgjedhja për t’u rikthyer të Vllaznia ka qenë shpirtërore, pasi këtu kam kaluar emocione të bukura dhe dua t’i ripërjetoj ato.
Trajneri dhe lojtarët e rinj – Më kanë pritur mirë, ka atmosferë pozitive. Më kanë afruar lojtarët e rinj. Ka edhe lojtarë që i kam pasur më parë në grup.
Ndeshja e Europës – Do jetë përballje e vështirë pasi rumunët kanë nivel të lartë. Ne futemi në fushë për të bërë maksimumin.
U largova me medalje të Kupës, pse mos fitojmë këtë sezon titullin kampion? Do ishte arritje e madhe.
Tifozët – Nuk kam mesazh specifik, janë ndër më të mirët në Shqipëri dhe sa herë ekipi ka nevojë janë gjendur pranë”, tha Marku.
