Ditët e fundit është publikuar një pjesë e raportit vjetor të SHISH ku flitet për një zyrtar, me emrin e koduar “Çelësi” i cili mbante kontakte me diplomatin e një vendi jo mik, i cili në raportin e shërbimit sekret emërtohet “Rezidenti”.
Paralelisht me publikimin e raportit të SHISH, nga SPAK u njoftua mbi një hetim mbi 5 ish-zyrtarë, të cilët kanë qenë ish-punonjës të SHISH dhe Policisë së Shtetit, vite më parë, që po hetohen lidhur aktivitet spiunazhi.
Ervin Karamuço dhe Ilir Kulla, dy ekspertë të sigurisë, në emisionin Zonë e Lirë, kanë interpretuar këto dy momente si një përplasje mes strukturave përkatëse, SHISH dhe SPAK.
Karamuço shkoi pak më tej kur tha se në kushtet kur drejtori i SHISH nuk ndodhet në Shqipëri dhe për herë të parë publikohet një raport me një histori spiunazhi, ndoshta është një luftë e brendshme, për të larguar kreun e SHISH, në kushtet kur do të kemi edhe një President të ri. Sipas tij, ndoshta ka të bëjë me buxhetet financiare, pasi përmes historive të tilla mund të kërkohen më shumë fonde.
Ndërsa Kulla tha se ndoshta ka një përplasje mes SPAK dhe SHISH, dy agjensi ligjzbatuese.
Kulla tha se në hetimin e njoftuar nga SPAK më shumë duket si një goditje ndaj djalit të një prej personave që përmendet, i cili është larguar nga SHISH 20 vite më parë. Kulla tha se djali i ish-zyrtarit të SHISH ka qenë drejtor i Adisa, një institucion që ka pasur të dhënat sensitive të qytetarëve.
