“U bëj thirrje oligarkëve: Mos e inkriminoni veten me Edi Ramën, është fatale ajo që bëni”. Ky ishte apeli i kryetarit të Partisë Demokratike Sali Berisha për ata që cilësohen oligarkë dhe janë të përfshirë në projekte të dyshimta, duke përfituar para apo të mira publike.
“Sepse ka ligje në botë, s’është kushte të filmohesh duke dorëzuar valixhen me euro. Por nëse ti kryen veprime si i djeshmi që ia u merr paratë qytetarëve dhe ia u jep oligarkëve, klientelës, automatikisht kjo quhet shpërndarje parash”, tha Berisha.
Ai përmendi projektin për menaxhimin e parkut të Butrintit, inceneratorët dhe të tjera projekte të shumëpërfolura si korruptive..
“Nëse shpërbën parkun kombëtar me një projekt gjoja të menaxhimit të sajtit arkeologjik, s’ka diskutim që ajo është një nga megaaferat më të mëdha të Shqipërisë dhe Evropës ndaj dhe unë kam këtë thirrje: S’do gëzoni një pasuri të vendosur duke paguar duke e ndarë me Edi Ramën dhe qeveritarët e tij. Ky është zotim solemn. PD është e angazhuar në një platformë për luftën ndaj korrupsionit nga më seriozet që ka parë vendi. Do mobilizojë potencialet e vendit dhe ato ndërkombëtare dhe këto akte kriminale nuk do mbeten pa përgjigje”, u shpreh Berisha.
“Pas një 73-vjeçari anonim pa asnjë burim pasuror të veçantë, por që qëndron me siguri një qeveritar, na del investitori strategjik përtej Vollgës në qytetin e Durrësit. Është i ri ky, se këta dalin njeri pas tjetrit… Kam një thirrje për ta: tërhiquni mos vidhni me Edi Ramën mos u bëni bashkëvjedhës me Edi Ramën, mos plaçkitni pasuri publike me Ramën dhe ministrat e tij. Rama është kapur në flagrancë me inceneratorët, Butrintim, shpalljen e familjarëve të ministrave investitorë strategjikë. Ky njeri s’mund ti shpëtojë ligjeve të vendit e atyre ndërkombëtare”, tha Berisha.
