Ish-ministri i Drejtësisë, Ylli Manjani sjell në vëmendje një përpjekje të Presindetit amerikan për të ulur çmimin e karburanteve dhe bën një paralelizim me Shqipërinë.
Në një postim në FB, Manjani shkruan se Joe Biden po i kërkon kongresit të pezullojë taksën e karburantit, përtej debateve të ekspertëve atje. Qëllimi, shton, është ulja e çmimit të karburanteve, pra mbrojtja e popullsisë nga çmimi i lartë.
Ish-ministri ndalet te situata në vend, ndërsa kryeministrin Edi Rama e quan “matrapaz”:
“Ky që na bën si shefi i Joes, themeluesi i Ballkanit të Hapur, as që e qeth hiç për popullsinë e vet. E rrit çmimin për kokërr të qejfit, jo për të mbrojtur konsumatorin, por për të rritur të ardhurat në buxhetin e qeverisë. Ti shtojë ca pare vetes për atë tajaren që fluturon e salltanete të tjera të rastit… Dmth qeveria e tij rrjep pastër fare popullin e vet në kohë krizë. Rritja e fitimeve në kohë lufte e krizash, në kurriz të konsumatorëve, quhet matrapazllëk. Ndërsa Ai është matrapaz”.
Më tej kujton se si Rama iu ‘qep’ Presindetit amerikan gjatë samitit të NATO-s në Madrid, për të shkëputuar disa pamje pranë tij, që u propaganduan në mediat pranë pushtetit si një “takim” i Ramës me Biden.
“Dhe si të gjithë matrapazët kujdeset të shesë foto e video se është taku me atë të madhin e Amerikës, ku i ka thënë gjëra të mëdha e të mençura. I lemë të gjitha këto,po si si vjen marre që gjith ai rryp i gjatë iu qep si zar një plaku që ishte në punë të vet e as që e kishte haberin se kush ishte ky që i vinte vërdallë dhe i fërkonte shpatullën!? A është udhëheqës i madh?! Pse nuk ulet të bisedojë në një takim zyrtar siç bëhet në tilla raste?! Ça do të na tregojë se Ai Joe Biden e ka shok të ngushtë?! Kanë luajtur basketboll bashkë me Dinamon?!Apo e ka pasë komshi te Myslym Shyri?! Hapu dhè! Mirë me ne, po edhe Presidentit të Amerikës i bën matrapazin”, shton Manjani.
