Kompanitë e ndërtimit do të kompensohen me 6 miliardë lekë për shkak të rritjes së materialeve.
Ministrja e Financave dhe Ekonomisë, Delina Ibrahimaj, gjatë prezantimit të aktit normativ për kompensimin e çmimeve të ndërtimit, bëri të ditur se janë rreth 300 kompani që do të provojnë përmes faturave rritjen e materialeve të ndërtimit. Nga ky akt kompensimi për secilin operator është 5 deri në 30%, shtoi ajo.
Ibrahimaj tha se në dy muajt e fundit është vënë re një ngadalësim i sektorit të ndërtimit.
“Ne po mbështesim bizneset që do ndihmojnë ekonominë shqiptare, por edhe të mbajnë normat e punësimit. Ne kemi një ngadalësim në ecurinë e prokurimeve publike që kanë qenë në 14%.
Referuar shifrave të qarkullimit në ndërtim, kemi një ngadalësim me 1.6% në krahasim me vitin e kaluar. Ndonëse sektori i ndërtimit në tremujorin e parë të këtij viti rezultoi me rritje ekonomike, në dy muajt e fundit kanë pasur një impakt në ngadalësimin e qarkullimit të këtij sektori.
Dhe qeveria në këto raste e ka për detyrë të ndërhyjë dhe të garantojë rritje ekonomike. Ky akt normativ prek investimet në infrastrukturë dhe ato në rindërtim, që janë nevojë jetike për ekonominë”.
“Unë do ta cilësoja si emergjencë kombëtare ndërhyrjen në këtë sektor. Procedurat e përfitimit të kompensimit janë përcaktuar me detaje në Aktin Normativ dhe i referohen realizimit të një kontrate shtesë për punë që kryen mbas miratimit të këtij akti.
Kompensimi për secilin operator është 5 deri në 30 për qind. Ndërkohë që çmimet mund të jenë rritur më shumë se 30%, ky është një risk që do ta ndajmë me kompanitë. Përfitues janë rreth 300 kompani. Janë shumë kontrata që janë lidhur prej fillimit të këtij akti normative.
Efekti maksimal është 6 miliardë lekë. Fondet do të lëvrohen bazuar në faturat që do të dorëzohen pranë autoriteteve kontraktore dhe bazuar në një analizë të realizimit të këtyre punimeve.
Ne nuk e dimë se çdo të ndodhë me çmimet e materialeve të ndërtimit në të ardhmen, ne nuk e dimë nëse do të vijojnë të jenë kaq të larta, ne do të njohim deri në 30% të shpenzimeve që janë të parashikuara të lidhura me këto produkte”.
