Anëtari i Kryesisë së Partisë Demokratike, Belind Këlliçi, është pyetur mbrëmjen e sotme se përse Enkelejd Alibeaj dhe Gazment Bardhi nuk janë bërë pjesë e grupeve të punës për protestën e 7 korrikut.
Këlliçi tha në emisionin “Now” me Erla Mëhillin se emrat e tyre nuk janë përfshirë në grupet e punës, pasi janë shprehur kundër pjesëmarrjes në protestë.
“Kam përshtypjen se të dy kanë patur qëndrime publike. I kemi vendosur në mbledhje kryesie. Janë lexuar emrat. Ka patur një vendimmarrje politike, të përbashkët.
Duke qenë se janë shprehur kundër, të paktën zotin Alibeaj e kam lexuar, që ishte shprehur kundër pjesëmarrjes në protestë, kundër vullnetit të demokratëve, është vendosur të mos shqetësohet duke mos u bërë pjesë e grupit të punës. Kam përshtypjen për të njejtin qëndrim edhe për Gazin.
Ky është mendimi im. Ndërkohë, të tjerët janë votëbesuar nga demokratët, votat ia ka numëruar PD, ia ka mbrojtur PD dhe sigurisht kanë detyrë t’i përgjigjen PD dhe demokratëve, të cilët kanë thirrur protestë më 7 korrik”, tha Këlliçi.
