Rritja drastike e çmimit të naftës në vendin tonë ka bërë që shumë drejtues automjetesh të blejnë naftë në vendet fqinje, si në Kosovë apo në Maqedoni, për të kursyer para në xhepat e tyre.
Por përpjekja për të kursyer para përballë krizës së ushqimeve dhe karburantit, një 56- vjeçari nga Elbasani i kushtoi prangat, menjëherë sapo doli nga pika e kalimit kufitar të Qafë-Thanës.
Në automjetin tip “Benz”, policia sekuestroi 40 litra naftë në dy bidonë. Nafta në Maqedoninë e Veriut kushton rreth 220 lekë, ndërsa në Shqipëri kushton 260 lekë.
Dy ditë më parë, nën akuzë për kontrabandën e naftës u arrestua edhe një burrë në pikën e kalimit kufitar të Kapshticës në Korçë. Agjencia e Mbikëqyrjes Policore tha se i arrestuari K. A. është filmuar duke korruptuar doganierët dhe policët kufitarë për të kaluar mallrat pa paguar detyrimet doganore.
Duke nisur nga dita e sotme, shqiptarët do të duhet ta paguajnë një litër naftë 255 lekë. Ishte Bordi i Transparencës që me një mbledhje të ditës së djeshme vendosi të ulë me 3 lekë për litër çmimin e naftës.
Një ditë më parë çmimi i naftës ishte 258 lekë/ litër ndërsa nga sot bëhet 255 lekë për litër. Kjo ulje thuajse e papërfillshme për konsumatorët e vegjël vjen në një kohë kur në bursa çmimi i naftës është ulur ndjeshëm, por që këto lëvizje pasqyrohen pak ose aspak në vendin tonë.
Ndërkohë çmimi i benzinës është rritur nga Bordi, të cilin vetë kryeministri Edi Rama e cilësoi si Bord Komunist. Kështu nga 239 lekë/ litri, shqiptarët do e paguajnë një litër benzinë me 242 lekë.
Çmimi i shitjes me pakicë i nënproduktit gaz, të jetë 83 lekë/litri me pakicë dhe i shitjes me shumicë 71 lekë/litër për automjetet.
