Vijojnë të jenë prezente valët e të nxehtit afrikan duke diktuar ne vendin tonë mot të kthjellët dhe të nxehtë gjatë paradites.
Sipas Meteoalb, pjesa e dytë e ditës sjellë kalim të vranësirave nëpër të gjithë territorin e vendit ku më të theksuara vranësirat paraqiten në zonat veriore dhe verilindore, duke sjellë momente me pika shiu. Parashikohet që orët e mbrëmjes të vijojnë nën dominimin e motit të kthjellët dhe të nxehtë.
Temperaturat e ajrit do të rriten në mëngjes dhe në mesditë duke luhatur vlerat ditore nga 14°C deri në 36°C.
Më freskët do të jetë në Ersekë ku temperatura maksimale do të arrijnë deri në 28 gradë celcius, më pas në Korçë e Pukë ku temperatura maksimale shënon 29 gradë celcius.
Ndërsa më nxehtë do të jetë në Elbasan e Gjirokastër që do të shënojë pikun për ditën e sotme, 36 gradë celcius.
Tirana, Shkodra, e Berati do të shënojnë 35 gradë.
Era do të fryjë mesatare në tokë dhe në det me shpejtesi 28 km/h nga drejtimi veriperëndimor duke krijuar në brigjet detare dallgëzim 1 – 2 ballë.
