Këshilli për Rregulloren dhe Imunitetin vendosi shtyrjen e mbledhjes ku ishte planifikuar të diskutohej kërkesa e deputetëve demokratë për shkarkimin si deputete të Olta Xhaçkës.
Shkak për këtë kërkesë, sipas ligjvënësve demokratë, është përfshirja e bashkëshortit të saj, ish-deputetit të PS Artan Gaçi, në një projekt në bregdet si investitor strategjik.
PD akuzon se ministrja Xhaçka është në konflikt interesi sa i takon një vendimi të Këshillit të Ministrave për ccështjen, Opozita pretendon se bashkëshorti i saj qëndron pas një kompanie që do të ndërtojë resort turistik në bregdetin e Himarës në cilësinë e investitorit strategjik.
Në mbledhjen e sotme, socialistët kërkuan kohë për tu njohur me kërkesën.
Deputetja e PS-së, Ermonela Felaj u shpreh se e kanë marrë mocionin vetëm ditën e sotme dhe rrjedhimisht nuk janë njohur me të për të diskutuar.
Nga ana tjetër, opozita kërkoi të dëgjohej relatori, deputeti demokrat Saimir Korreshi.
Drejtuesja Lindita Nikolla vendosi shtyrjen e mbledhjes duke plotësuar kërkesën e kolegëve socialistë.
Mocioni “për ndjekjen e procedurës parlamentare për konstatimin e pavlefshmërisë dhe mbarimit te mandatit të deputetes Olta Xhaçka”, është firmosur nga 1/10 të deputetëve përfaqësues të Grupit Parlamentar të Partisë Demokratike.
