Qeveria shqiptare ka shpallur nismën më të re për të realizuar vepra arti në hapësirën publike. Nisma është prezantuar në një aktivitet ku ka qenë i pranishëm Kryeministri Edi Rama, ministrja e Kulturës Elva Margariti dhe artistët që kanë pranuar të përfshihen.
Gjatë fjalës së tij, kreu i qeverisë bëri të ditur se do të jenë 18 vepra arti që do të vendosen në 18 hapësira të ndryshme publike.
Afati i dorëzimit të projekteve do të jetë 7 Gushti.
“Është e qartë se cila është ideja, ka nevojë për më shumë informacion. Do të mund ta gjeni në faqen e Ministrisë së Kulturës. Qëllimi është që të ndërhyjmë në hapësirat publike duke krijuar një impakt. Objektivi është që të jetë një program i përvitshëm i qeverisë, të shtrihet jo vetëm në hapësirat publike. Program që do kërkojë edhe testin e eksperiencës për të parë sesi do ecë, çfarë të përmirësohet, sugjerimet apo kritikat e komuniteti, artistëve. Për ti garantuar qëndrueshmëri programit do jetë mirë ti japim një formë të posaçme institucionale. Programi ka edhe qëllimin, stimulimit të skenës artiske, mbështetjen e aktorëve”, tha Rama.
Fondi për këtë projekt është 200 milionë lekë, ndërsa ministrja e Kulturës, Elva Margariti shpjegoi të gjitha fazat sesi do të funksionojë. Margariti bëri me dije për këtë vit janë përcaktuar 18 lokacione. Aplikimi do të bëhet online në faqen e Ministrisë së Kulturës, deri më datë 7 gusht, më pas juria do të vlerësojë aplikimet deri më 28 gusht dhe fituesit do të shpallen më 2 shtator.
“Nismë shumëplanëshe që e kemi diskutuar me kryeministrin. Ide e tij për të sjell rikualifikim jo vetëm artistik por edhe urban të hapësirave publike. 200 milionë lekë, fond gjenroz, që i është besuar ministrisë së Kulturës. Vjen edhe një bashkëpunim i disa institucioneve për ti dhënë vlerë edhe identitetit lokal, por për të sjellë frymën edukimit, përmes artit. Të bëjë bashkë jo vetëm artistët, arkitektë., planifikues urban, inxhinierë ndriçues.
Në bashkëpunim me ARRSH për të identifikuar pika që mund të zhvillohen, duam ta vazhdojmë çdo vit. Kemi identifikuar 18 lokacione në të gjithë Shqipërinë, jo vetëm mbikalimi rrethrrotullimi, kemi edhe një qendër spitalore. Ky program në vitet në vazhdim të shtrihet edhe brenda institucioneve publike. Thirrja çelet në website-in e ministrisë së kulturës, e shpallim sot dhe çdo aplikant mund të paraqitet deri me tre vepra, mund të zgjedhë tre lokacione. Faza parë zgjat 45 ditë, deri më 7 gusht. Bëhet vlerësimi i ideve më pas mblidhet juria dhe përcakton një shortlist. Faza e dytë deri më 28 gusht. Më 2 shtator kemi shpalljen e fituesve,”-tha ajo.
Rama paralajmëroi që në të ardhmen do t’i kushtëzojnë institucioneve publike një pjesë shumë të vogël të buxhetit, me të cilën do të blejnë vepra arti dhe kështu do të mbështesin artistët.
