Kryeministri Edi Rama nuk ndal sulmet e tij ndaj Bashkimit Europian në prag të samitit që do të mbahet sot, dhe ku pritet një vendim për hapjen ose jo të negociatave, për Shqipërinë dhe Maqedoninë e Veriut.
Rama e konsideron shfaqje të turpshme atë që po ndodh, madje shkon edhe më tej kur e cilëson si shfaqje të frikshme impotence.
“Është një ditë e re në Evropë, por jo në Bullgari! Sa turp për Evropën kjo çështje bullgare!
Në mes të një lufte shumë të nxehtë në oborrin e pasmë të Evropës, një vend i NATO-s rrëmben dy vende të tjera të NATO-s nën mbikëqyrjen e 26 vendeve të BE-së që qëndrojnë të qetë në një shfaqje të frikshme impotence!”, shkruan Rama.
Prej disa ditësh Kryeministri Rama ëshët pozicionuar me tone të forta kritike ndaj BE-së, pas vetos bullgare, lidhur me Maqedoninë e Veriut, që ka bllokuar procesin e hapjes së negociatave, edhe për Shqipërinë.
Madje në qëndrimet e mëparshme, Rama la të hapur mundësinë që mos shkonte në Bruksel në datat 23 dhe 24 qershor, çka shkaktoi reagime të forta jo vetëm në politikën shqiptare.
