Analisti Arion Sulo është përplasur me deputetin e PS, Arben Pëllumbi, lidhur me konferencën e mbajtur sot në Bruksel pas Samitit të BE për Ballkanin Perëndimor, ku mes Ramës dhe Kovaçevskit ishte dhe Presidenti serb, Aleksandër Vuçiç.
Duke folur në “Open”, gazetarin Sulo, tha se Vuçiç nuk duhet të ishte në atë konferencë, por sipas tij, ishte pikërisht Rama që e ndihmoi atë, që t’i shpëtonte presionit të BE për sanksionet.
Edhe analisti Artur Zheji ka debatuar mbrëmjen e sotme me deputetin e PS, në lidhje me bllokimin e negociatave, i cili e ka quajtur një gabim të rëndë gjuhën e kryeministrit Edi Rama ndaj Bashkimit Evropian, duke thënë se nuk mund ta shantazhosh Evropën, pasi dëmton vendin tënd.
Pjesë nga debati:
Sulo: Çfarë do Vuçiç në konferencën për mos hapjen e negociatave?
Pëllumbi: Kur ta keni kryeministrin përpara pyeteni se ç’donte. Ne sot bëjmë analizë për atë që është ngjarje e ditës, pse Shqipëria nuk mori datën e negociatave?
Sulo: Doli i zverdhur nga zyra. Është një spekulant. Njëri hidhte topin, tjetri e kapte. Rama e ndihmoi Vuçiç për t’i shpëtuar presionit për sanksionet.
Pëllumbi: Ore Vuçiç bëri takimet e veta.
Sulo: E si doli?
Pëllumbi: E ç’na duhet neve ore si doli?
Sulo: Pse tha se do ketë luftë në rajon, nëse i bëhet presion Serbisë për sanksionet?
Pëllumbi: Nuk dështoi Shqipëria dhe RMV, por dështoi BE për të mbajtur fjalën ndaj vendeve tona, sepse Shqipëria dhe RMV rrinë peng e një vote bullgare, që ka të bëjë me aspekte historike.
Zheji: Ore ata thanë plas lufta në Ballkan. Të na pushtoni.
Pëllumbi: Nuk besoj që ne kemi dështuar.
Zheji: Mund të shohim përtej. Ka një gjë, neve na lejohet një lloj e folure, sepse jemi jashtë gardhin evropian. Jemi një vend që konsiderohemi në fazë primitive të qytetërimit evropian. Mund ta kemi pjellë këtë qytetërim në antikitet, por ta jemi në primitivë. Ne në gojë të ujkut kemi hedhur valle. Kjo është sindroma, nuk na duan. Për këtë do të mbrohemi në një bunker, ku kemi komandantin Rama, që do na mbrojë. Por, kemi dhe Vuçiç, që paralajmëron luftë. Si mund t’ia bësh këtë shantazh Evropës? Më duket se në këtë rast Ramës i mungojnë këshilltarët, ose është aq i dashuruar me veten, sa atë që bën në Kuvendin shqiptar me disa gjela, mendon se mund ta bëjë edhe me Evropën. Por, ka gabuar shumë rëndë.
Pëllumbi: E mendoj krejtësisht ndryshe dhe dëshiroj që ta shikoj veten, por dhe të përfaqësoj ata njerëz që nuk e shohin veten të persekutuar. Evropa ka të drejtë të na e thotë në sy, pa ju dridhur qerpiku, për gjërat që nuk i kemi bërë mirë, ndërsa ne nuk duhet t’ua them, kur në këtë rast nuk po shkojnë gjërat mirë me BE.
Zheji: Jam dakord, por nuk mund të shantazhosh BE-në. Nuk e shantazhoj dot, sepse i bëj dëm vendit tim.
Pëllumbi: Nuk ju kam ndërprerë në asnjë moment. Më vjen shumë mirë që zgjova agresivitetin tuaj, se jeni shumë i qetë.
Zheji: Ka ngatërruar skenën e teatrit.
Pëllumbi: Po lëreni që këtë gjë t’ia thonë ata. Unë mendoj krejt ndryshe, që nuk duhet të kemi frikë, që ajo që nuk shkon, t’ua themi. Dhe ua tha këtë gjë, që është problemi i tyre, që jemi në këtë situatë. Nëse ata nuk e zgjidhin këtë, BE do të ketë probleme shumë më të mëdha.
