Nga Boldnews.al
Me shprehjen amorfe dhe pa njësi matëse “cënim i besimit të publikut”, Komisioni i Pavarur i Kualifikimit (KPK) ka shkarkuar një numër të konsiderueshëm gjyqtarësh dhe prokurorësh.
I njëjti institucion ka konstatuar së fundmi se edhe komisionerja e Vetingut, Etleda Çiftja, duket se “ka cënuar besimin e publikut”, pasi është marrë e pandehur nga Prokuroria Speciale për probleme me pasurinë.
Por, zonja Çiftja vijon të jetë në detyrë.
“Boldnews.al” ka siguruar vendimin e plotë të një paneli të Komisionit të Pavarur të Kualifikimit, i cili ka pranuar kërkesën e gjyqtarit të Shkodrës, Andri Ymeri, për përjashtimin e saj nga trupa që po i kryen rivlerësimin kalimtar.
Gjyqtari ka argumentuar se Çiftja ka papajtueshmëri me funksionin, pasi nuk mund të verifikojë pasurinë e gjyqtarëve, ndërkohë që vetë është e pandehur për problemet me pasurinë.
Kërkesa e tij u shqyrtua nga një panel, i përbërë nga Genta Bungo (Tafa), Olsi Komici dhe Brunilda Bekteshi.
Në përfundim, Bungo dhe Komici pranuan kërkesën për përjashtim, ndërsa Bekteshi ishte kundër.
“Cënim i besimit të publikut”
Në vendimin e shumicës, lexohet: “Në kushtet kur komisionerja është marrë si e pandehur nga një organ i drejtësisë së re, mund të perceptohet nga publiku si e papërshtatshme për të kryer procesin e rivlerësimit të gjyqtarëve dhe prokurorëve”.
Trupa e KPK-së është munduar që, të paktën formalisht, të mos rëndojë shumë pozitën proceduriale dhe ligjore të koleges së tyre.
“Nisur nga prezumimi i pafajësisë, trupi gjykues vlerëson se besimi i publikut nuk mund të përbëjë shkak të mjaftueshëm për cënimin e të drejtës së komisioneres për t’u prezumuar e pafajshme deri në një vërtetim të së kundërtës”, thuhet në vendim.
Por, pas këtij elementi “butësie”, shumica e trupës që shqyrtoi kërkesën për përjashtimin e Etleda Çiftjas nga Vetingu i gjyqtarit të Shkodrës, kthehet sërish në pozicion “luftarak”.
“Kushtetuta parashikon se rivlerësimi përfshin kontrollin e pasurisë, figurës dhe aftësive profesionale (të gjyqtarëve dhe prokurorëve, shën.red)…Në këto kushte, kur komisionerja Etleda Çiftja…do të duhet të vlerësojë pasurinë e subjektit, por nga ana tjetër ajo akuzohet nga Prokuroria e Posaçme për vepra penale që lidhen me pasurinë e saj apo mënyrën e deklarimit, duket sikur lind një konflikt në dukje, që bën të ngrihet një dyshim i arsyeshëm se procesi i rivlerësimit të subjektit Andri Ymeri nuk do të zhvillohet në përputhje me parimet e objektivitetit dhe paanësisë…”.
Në konkluzion të këtij argumentimi, shumica e panelit ka vendosur të pranojë kërkesën e gjyqtarit dhe përjashtimin e saj nga trupa që po kryen rivlerësimin e tij.
Ndërkohë, anëtarja në pakicë e panelit, Brunilda Bekteshi, e cila mund të gjendet vetë në një situatë të ngjashme me kolegen Etleda Çiftja, ka shprehur qëndrimin kundër përjashtimit, duke argumentuar se ky vendim nuk ka bazë ligjore.
Bekteshi ka një llogari të hapur me institucionet e drejtësisë. Ajo është kallëzuar për deklarim të rremë të pasurisë dhe falsifikim dokumentash.
Prokuroria e Posaçme e pushoi hetimin për Brunilda Bekteshin në dhjetor 2021. Por Gjykata e Posaçme e riktheu çështjen për hetim.
Prokuroria e ka dërguar sërish për pushim, ndërkohë që pritet vendimi i radhës i gjyqtarit paraprak.
