Nga Boldnews.al
Anëtarja e Komisionit të Pavarur të Kualifikimit, Etleda Çiftja, është marrë prej prej javësh e pandehur nga Struktura e Posaçme Anti-Korrupsion për “falsifikim dokumentash” e “deklarim të rremë të pasurisë”, e megjithatë ajo vijon normalisht detyrën.
Institucionet e rivlerësimit dhe të tjerët e Drejtësisë së Re nuk kanë reaguar për pezullimin e saj nga detyra dhe as nuk denjojnë që të japin përgjigje për interesimin mediatik se përse qëndrojnë tërësisht pasiv, siç ka raportuar më herët “Boldnews.al”.
Megjithatë, këtë të Martë (21 qershor), Komisioni i Pavarur i Kualifikimit ka ndërmarrë një hap ndaj komisioneres Çiftja, i cili gjithësesi është gjysmak.
Një treshe gjykuese e KPK-së ka pranuar kërkesën e gjyqtarit të Shkodrës, Andri Ymeri, për përjashtimin e Etleda Çiftjas nga trupa që po kryen rivlerësimin e tij.
Gjyqtari Ymeri u paraqit në seancë dëgjimore të procesit të Vetingut në 13 Qershor, përballë panelit të kryesuar nga Pamela Qirko, relator Roland Ilia dhe anëtare Etleda Çiftja.
Gjatë seancës, gjyqtari kërkoi përjashtimin e dy anëtarëve të trupës, Ilia dhe Çiftja.
Në kërkesën për përjashtimin e komisioneres Çiftja, subjekti Ymeri argumentoi se ajo ishte marrë e pandehur në një hetim penal që është zhvilluar nga SPAK dhe se nuk ka legjitimitetin për të zhvilluar procesin e rivlerësimit.
Madje, duke përdorur edhe ironinë, subjekti i rivlerësimit shkruan në kërkesën për përjashtimin e Çiftjas se çështja duhet të shënohet në “Rekordet Guinnes”, si rasti i vetëm në botë ku një gjyqtare e marrë e pandehur gjykon gjyqtarët.
Kërkesa për përjashtimin e Etleda Çiftjas nga treshja e Vetingut të gjyqtarit Ymeri u shqyrtua nga trupa e përbërë prej Genta Bungo (Tafa), Olsi Komici dhe Brunilda Bekteshi, e cila pranoi kërkesën për përjashtim.
Argumentat e këtij vendimi ende nuk janë bërë publike.
Ndërkohë, një panel i dytë ka pranuar edhe kërkesën tjetër të Ymerit, atë për përjashtimin e relatorit Roland Ilia, pasi ai ka shqyrtuar më herët një çështje ku ka qenë i përfshirë komisioneri i sotëm i Vetingut.
Gjatë javëve të fundit, pas marrjes si e pandehur, komisionerja Etleda Çiftja ka qenë pjesë e trupave edhe për dy subjekte të tjerë.
Seanca për gjyqtarin e Tiranës, Altin Abdiu, u ndërpre, pasi subjekti paraqiti kërkesën për përjashtimin e Etleda Çiftjas nga trupa e rivlerësimit, me argumentin e “papajtueshmërisë me funksionin”.
Rasti është ende në shqyrtim.
Ndërkohë, komisionerja Çiftja ka qenë pjesë aktive në seancën dëgjimore dhe vendimin për dërgimin në Shkollën e Magjistraturës të prokurorit të Tiranës, Gjergji Tako.
