Përdori të drejtën për të mos u përgjigjur, Daniele Bedini gjatë marrjes në pyetje për vrasjen e transeksualit 43-vjeçar Carlo Bertolotti, ngjarje e ndodhur dy javë me parë në Marinella di Sarzana (La Spezia), 24 orë pas vrasjes së shqiptares Nevila Pjetri. 32-vjeçari Bedini është i dyshuari kryesor dhe i vetëm për të dyja vrasjet.
Paraditen e kësaj të hëne, ai nuk pranoi t’i përgjigjej pyetjeve të gjyqtarit gjatë një lidhjeje në distancë nga burgu i Spezia ku ndodhet.
35-vjeçarja shqiptare u vra mes natës së 4 dhe 5 Qershorit, në Marinella di Sarzana dhe 24 orë më vonë të njëjtin fat pati edhe transeksuali i njohur ndryshe si Camilla, që u gjet rreth 3 kilometra më tutje. Të dyja viktimat ishin rrahur e më pas ishin ekzekutuar me plumba pistolete në kokë.
Arma e përdorur, e kalibrit 22, si pistoleta që babai i Bedinit e kishte denoncuar të vjedhur, nuk është gjetur ende.
Nevila Pjetri dyshohet se u vra gjatë një tentative për ta grabitur. Sipas hetuesve italiane, Bedini ishte në kërkim të parave për të blerë drogë, ndërsa Camilla me gjasë sepse ishte dëshmitare e vrasjes së parë, ose edhe ajo po ashtu sepse 32-vjeçari donte ta grabiste.
ANSA shkruan se Camilla u përcoll për në banesën e fundit mëngjesin e kësaj të hëne.
