Opozita maqedonase mbushi sheshet mbrëmjen e djeshme pas një incidenti të provokuar nga deklaratat e Kryeministrit Edi Rama.
Ky i fundit, në një samit me praninë e kancelarit gjerman, Olaf Scholz, e quajti kryeministrin e Maqedonisë së Veriut, si kryeministrin e Bullgarisë Perëndimore. Deklarata e Ramës po shfrytëzohet nga opozita maqedonase e cila kërkon largimin e qeverisë dhe zgjedhje të parakohshme, ndërsa vetë Kryeministri i Shqipërisë në një reagim të tij i konsideroi si muhabete mejhanesh atë që ndodh në vendin fqinj.
Rama shprehet se është për të qeshur dhe qarë histeria e disa personave në Shkup, pasi ironizoi bllokadën e shëmtuar ndaj Maqedonisë së Veriut nga ana e Bullgarisë.
“Për të qeshur dhe qarë histeria e disave në Shkup ndaj kryeministrit Kovaçevski, pas publikimit të videos së duarshtrëngimeve me Kancelarin Scholz në Selanik, ku ironizova bllokadën e shëmtuar ndaj Maqedonisë së Veriut nga ana e Bullgarisë! Sherr mejhaneje mes tymit të qofteve”, reagonte Rama, pasi opozita në Maqedoninë e Veriut paralajmëroi nisjen e protestave kundër kryeministrit Dimitar Kovaçevski, i cili nuk kishte reaguar ndaj batutave të homologut shqiptar.
Por, kryetari i PD, Sali Berisha, duke publikuar edhe pamje nga protestat në Maqedoninë e Veriut, shkruan “ja çfarë ndodh kur futet hokatari i rrjedhur në sherr në samite!
50.000 vetë protestojnë në Shkup kundër kryeministrit të tyre, që heshti kur Edi Rama, shakaxhiu pa kripë, i tha kancelarit Scholz për të, se ky është kryeministri i Bullgarisë Perëndimore!”.
