Kryebashkiaku i Tiranës, Erion Veliaj, gjatë një takimi me strukturat socialiste në kuadrin e riorganizimit të PS, tha se nuk ka asnjë rëndësi se kush do të jetë rivali i tij në zgjedhjet e vitit tjetër, pasi ai do të fitonte.
Veliaj tha se aq më mirë sikur të kemi përballë vjetërsirat e 30 viteve, pasi ne i kemi mundur si Saliun ashtu edhe Ilir Metën.
“A do të kandidojë Ilir Meta për kryebashkiak, sikundër flitet? Nuk ma do mendja, pasi ai nuk është burrë që të mbajë fjalën dhe ne të gjithë e dimë. Megjithatë bujrum le të vijë dhe do e mundim”, tha Veliaj.
Ai kërkoi angazhimin e të rinjve në PS, duke u shprehur se kjo forcë bën ndryshimin. “Shqiptarët kërkojnë ndryshim dhe ndryshimi jemi ne. Deputetët janë zëdhënës të komuniteteve që i kanë votuar, ne nuk i ndajmë njerëzit në të majtë dhe të djathtë, ndaj dhe ne rritemi nuk zvogëlohemi”, tha Veliaj.
Ai u shpreh se socialistët kanv menaxhuar me sukses dy momente të vështira, që nuk i shkaktuan ato, tërmetin dhe pandeminë, ndërsa PD kur ishte në qeverisje nuk menaxhonte dot as tragjeditë që shkaktonte vetë si ajo e Gërdecit apo 21 janarit.
