Pas vetëm një dite, bordi që vendos çmimin e karburabteve, i krijuar me vendim qeveria, ka ulur me 4 lekë çmimin e naftës, por duke mbetur sërish në shifër rekord.
Kështu nga ora 18:00 e ditës së sotme nafta do të shitet në pompa me 261 lekë për litër, kurse benzina 236 lekë/litri.
Ndërsa çmimi i shitjes me pakicë i gazit do të jetë 86 lekë/litri.
“Çmimet e caktuara nga Bordi do të hynë në fuqi sot datë 18 Qershor ora 18.00 p.m dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes”, thuhet në njoftimin e bordit.
“Jemi në monitorim të vazhdueshëm të ecurisë së bursave, me qëllim reagimin sa më të shpejtë”, thuhet më tej në njoftim.
Nafta bruto Brent preku në bursa kuotën e 113.5 dollarëve për fuçi, çmimi më i ulët që prej nisjes së këtij muaji dhe njëkohësisht më i liri që prej vendosjes së sanksioneve të Bashkimit Europian ndaj naftës ruse. Por në vendin tonë, Bordi i Karburanteve po mban një çmim rekord.
Ndërkohë, sipas të dhënave të publikuara nga Global Petrol Price, Shqipëria është zyrtarisht vendi i dhjetë në botë për sa i përket shtrenjtësisë së çmimit të naftës dhe lë pas vetëm 9 vende shumë më të pasura si Hong Kongu, Suedia, Norvergjia apo Islanda.
