Komisioni i Posaçëm i Reformës Zgjedhore mbylli punimet për ditën e sotme.
Një nga kryetarët e tij, përfaqësuesi i maxhorancës Damian Gjiknuri, tha se ky është i vetmi komision që jemi të detyruar të respektojmë njeri-tjetrin dhe të arrihet në një marrëveshje nëse duam zgjidhje.
Ndërkohë deputeti Fatmir Mediu propozoi një minutazh prej 3 minutash për secilin deputet për çështjes të caktuara, propozim ky që pati konsensusin e të gjithëve.
Po ashtu u zgjodhën dhe dy sekretarët e tij, Klevis Xhoxhi nga PS dhe Dashnor Sula nga PD.
Deputeti i Partisë Demokratike, Oerd Bylykbashi kërkoi në Komisionin e Posaçëm për Reformën Zgjedhore që kjo çështje të mos kthehet në një pazar. Sipas tij, nëse do të ketë pazare, atëherë do ketë një krizë politike.
‘Nuk duhet të jetë si fundi i vitit 2020 i asaj reforme ku një pazar jo thjesht ndryshoi Kodin Zgjedhor, por shkatërroi një sistem zgjedhor. Rregullat e lojës nuk ndërrohen në mënyrë të njëanshme. Ne sot duhet të punojmë bashkë për të vënë rregulla loje për zgjedhësit, jo për ne 19 vetat që jemi në komision apo 140 veta që do votojnë. Nëse kjo reformë do shërbejë për të krijuar krizë politike, më mirë mos nisë se do të jetë themeli i një krize që do na çojë mbrapsht 20 vite,” tha Bylykbashi.
