Avokati Indrit Sefa ka dhënë një intervistë për Fax News, ku përveç bojkotit të seancave gjyqsore nga avokatët si kundërshtim i hartës gjyqësore, ka folur edhe për protestat e paralajmëruara së fundmi nga qytetarët për rritjen e çmimeve.
Ai tha se harta e re gjyqësore nuk ishte mirëpritur nga dhoma kombëtare e avokatisë e cila sipas tij ka pasur propozime më të vlerfshme për t’u ardhur në ndihmë qytetarëve.
Ndërsa sa i përket protestave të qytetarëve kundër rritjes së çmimeve, avokati u shpreh se qytetarët ndiheshin të braktisur nga qeveria pasi nuk ishte ndërmarrë asnjë masë për uljen e taksave si në vendet e tjera.
“Qytetarët përditë dhe më shumë po e shohin se qeveria nuk po ndërmerr masat e duhura sepse ka mbetur në të njëjtën bazë taksimi. Kemi rastet më të mira të vendeve të tjera të cilat kanë bërë reduktime të taksave dhe të TVSH-së. Qeveria shqiptare nuk ka reaguar dhe nuk ka ndërmend të reagojë sepse kjo lidhet dhe me arkat e shtetit që janë bosh. Qytetarët kanë ndjenjën e revoltës sepse nuk janë mbështetur nga qeveria”– u shpreh Sefa ndër të tjera.
