Një grup trafikantësh, i përbërë kryesisht nga shqiptarë të angazhuar në kultivimin e kanabisit u godit në Barcelonë të Spanjës, duke çuar në burg 56 persona.
Agjentët e policisë së Generalitat-Mossos d’Esquadra të Divizionit të Hetimit Kriminal, së bashku me zyrtarë të Shërbimit të Mbikëqyrjes të Agjencisë Tatimore, kanë çmontuar një nga rrjetet më të mëdha kriminale të dedikuar për prodhimin e marijuanës. Mediat spanjolle raportojnë se të arrestuarit janë nga mosha 19 deri në 58 vjeç, të cilët akuzohen për krime kundër shëndetit publik, në fushën e trafikut të drogës, organizimit kriminal dhe mashtrimit me energjinë elektrike.
Më 24 maj, një operacion i përbashkët dhe i koordinuar mes dy forcave policore, i cili u krye në disa bashki të Katalonjës, përfundoi me çmontimin e kësaj organizate kriminale dhe arrestimin e 56 personave, mes të cilëve edhe drejtues të organizatës.
Gjithashtu janë bërë 37 regjistrime, janë çmontuar 24 plantacione dhe janë sekuestruar mbi 22600 bimë dhe 166 kilogramë sytha të përgatitura për shitje.
Gjatë operacionit, agjentët gjetën gjithsej 225765 euro para cash, një armë gjahu, një pistoletë, një pistoletë me ajër të ngjeshur dhe armë të ndryshme me presa të mprehta. Pasi të jenë çmontuar plantacionet, pronat do t’u kthehen pronarëve të tyre, siç përcaktohet nga autoriteti gjyqësor.
Instalimi i të gjitha sistemeve të ndriçimit dhe vaditjes për rritjen e kultivimit të kanabisit ka bërë që trafikantët të dëmtojnë shtëpitë, pasi kanë hapur mure, kanë hapur vrima në dyer dhe dritare apo tavane dhe kanë dëmtuar rrjetet e energjisë elektrike.
Ekspertët besojnë se organizata ka përfituar, vetëm në Katalonjë, më shumë se tre milionë euro me trafikimin e kësaj lënde, një shifër që mund të shumëzohet me tre ose katër me eksportin e kësaj substance në pjesën tjetër të Evropës.
Kështu grupi mund të kishte fituar nga nëntë deri në 12 milionë euro në vit.
Për këto fakte, Agjencia Tatimore ka hapur një hetim paralel për një krim të dyshuar pastrim parash.
“Paratë që ata fituan në Katalonjë u kthyen në qarkun ligjor të parave, kryesisht në tre mënyra”, shpjegoi kreu i Shërbimit të Mbikëqyrjes Doganore të Agjencisë Tatimore Antonio Lajusticia.
E para, duke dërguar para në Shqipëri , në vendin e origjinës së të arrestuarve, në valixhe apo transaksione të vogla ekonomike. Nga ana tjetër, ata blenë biznese në Katalonjë, kryesisht bare dhe kafeteri në të cilat i injektonin këto para dhe i kalonin në dobi të këtyre bizneseve.
Dhe së fundi, me blerjen e pasurive të paluajtshme nga drejtuesit e organizatës.
