Zv.ministri i Financave, Besart Kadia, tha mbrëmjen e sotme se nëse kriza e çmimeve do të vijojë, do të ketë qytetarë që nuk do të kenë mundësi të ushqehen.
Por sipas tij, kjo është një krizë e përkohshme, edhe pse nuk ishte në gjendje që të deklaronte se sa kohë mund të zgjaste kriza.
Në emisionin “Open”, Kadia u pyet disa herë se sa kohë do të zgjaste kriza, por tha se nëse do të mund të jepte një afat të tillë do të punonte për rezervën Federale.
“Nuk mund të them sa zgjat kriza, por ajo që është e rëndësishme është se ne po e monitorojmë situatën, inflacionin e monitoron Banka e Shqipërisë”, tha ai. Kadia u shpreh se askush nuk e di sa do të zgjasë lufta. “Maqedonia e Veriut e ka rritur energjinë elektrike, ndërsa në Shqipëri jo. Rritja ekonomike këtë vit është 3 %, ndërsa inflacioni është 7 % dhe shpresojmë që të bjerë nga vera”, tha ai.
