Ministria e Shëndetësisë dhe Instituti Kombëtar i Shëndetësisë Publike në Kosovë njoftuan se mostra e pacientit nga Kosova të dyshuar në linë e majmunëve, e dërguar për testim në Laboratorët e Holandës, ka rezultuar negative.
Më 3 qershor 2022 IKSHPK ka pranuar nga Klinika Infektive-QKUK një raportim për një rast të dyshimtë me linë e majmunëve, për një pacient mashkull nga komuna e Dragashit, i hospitalizuar në këtë klinikë, dhe të cilit i ishte marrë mostra nga ndryshimi lëkuror për t’u dërguar për analiza laboratorike në Holandë.
IKSHPK është njoftuar sot nga laboratorët respektivë të këtij shteti, që kjo mostër ka rezultuar negative dhe rasti në fjalë nuk ka rezultuar të jetë i prekur nga lia e majmunëve.
