Nga Kievi ku shkoi bashkë me Kryeministrin e Malit të Zi, Dritan Abazoviç, kreu i Qeverisë shqiptare, Edi Rama, premtoi se bashkë me vendet e Rajonit, do të ndërtohen disa pallate të shkatërruara nga lufta në Irpin.
Duke folur për Rindërtimin, Rama tha se edhe BE ka shprehur gadishmërinë për shkatërrimin që lufta ka sjellë në Ukrainë, por tha se vendet e Rajonit, do të shmangin burokracitë.
“Sot patëm mundësinë të shohim nga shumë pranë Irpinin dhe jam vërtet i lumtur që ratë dakord me propozimin tonë për të bashkuar përpjekjet për të ndërtuar një bllok, secili prej vendeve ndërtesën e tij për fëmijët e Irpinit.
E di që BE dhe shumë të tjerë janë pjesë e kësaj përpjekjeje, por le ta bëjmë në mënyrën Ballkanike, të jemi të parët që e bëjmë këtë gjë”, tha Rama.
Deklaratat e Kryeministrit mund të konsideroheshin si sukses, por me rindërtimin Qeveria Rama nuk i ka punët edhe aq mirë, pasi banesat e shkatërruara apo dëmtuara që nga tërmeti i 26 nëntorit 2019 ende nuk kanë përfunduar. Madje në inaugurimet ku shfaqet herë me Arben Ahmetajn, që e ka emëruar si ministër Rindërtimi, apo me Erion Veiajn si Kryebashkiak, janë investime të realizuara ose nga organizatat jo-qeveritare, ose nga të huajt, si në rastin e Turqisë.
