Hetuesit kanë ngritur dyshime mbi atentatin ndaj 27 vjeçarit Aleksandër Sadikaj se ndaj këtij të fundit është vendosur rreth 500 gram tritol.
Sipas prokurorisë Sadikaj ka dalë nga shtëpia në Sauk të vjetër dhe pak minuta më pas u hodh në erë bashkë me makinën e tij, duke e lënë fillimisht të gjymtuar, ndërsa humbi jetën në spital si pasojë e plagëve të rënda.
Në vendin e ngjarjes policia gjeti edhe një pistoletë që nuk dihet kujt i përket. Ndërsa prokuroria po heton në disa pista, atë të larjes së hesapeve si dhe atë të hakmarrjes për shkak se ishte përfshirë në ngjarje kriminale në Greqi, transmeton Neës 24. Gjithashtu, mësohet Aleksandër Sadikaj ka qenë në të njëjtin burg me Alket Rizain në shtetin fqinj.
Sadikaj u vra ditën e shtunë pas një shpërthimi të telekomanduar në automjetin e tij teksa udhëtonte drejt rreth-rrotullimit të Saukut. Ai u nxor i gjallë nga automjeti dhe u dërgua menjëherë në spital por nuk mundi t’i mbijetonte plagëve të rënda që i la shpërthimi.
Nisur nga hetimet e deritanishme dyshohet se autorët e ngjarjes kanë qenë vrasës me pagesë. Ndërsa mësohet se lënda plasëse ishte vendosur në anën e shoferit. Pas vrasjes së tij, motra e 27-vjeçarit Aleksandër Sadikaj ka bërë një reagim prekës në rrjetet sociale.
Ajo ka ndarë foton e 27-vjeçarit që njihej si “Aleksi i Memaliajt” në profilin e saj ku i dedikon disa rreshta prekës. Mes të tjerash ajo shkruan se jetonte vetëm për të vëllanë dhe sot nuk ka më jetë.
“Sot mbaroi dhe jeta ime bashkë me ty. Dua të vij të lutem më merr dhe mua. Djali më i mirë dhe më i bukur në botë të lutem vëllai im, shpirti im më merr të ikim të dy, më merr me vete të gjej paqen. Vetëm për ty jetoja, s’kam më jetë. Hajde të ikim. Të dy sot në një udhëtim të gjatë dhe të bukur të takojmë zotin ta pyesim pse”, shkruan ajo.
27-vjeçari Sadikaj i njohur ndryshe si “Aleksi i Memaliajt”, i riu ishte pronar i resortit “Sancho Farm Albania”, ku sipas ekstraktit të nxjerrë nga QKB-ja, ky subjet është regjistruar në janar të këtij viti.
27-vjeçari publikonte shpesh video dhe foto nga përditshmëria e tij në faqen e biznesit të këtij resorti. Nga postimet, duket se i riu është i apasionuar pas kuajve, një shërbim që ofrohet dhe nga resorti.
